Gaza-ah mi 40 chuangin nunna chan ti

Gaza-a humanitarian zone nia rin luh Israel in a beih avangin mi 40 chuangin nunna an chan niin Hamas-run Civil Defence authority te chuan an sawi a.
Israeli military te chuan an indo thlawhna te chuan Khan Younis a operation centre Hamas fighter tena an hman chu a bei tiin an sawi ve thung.
Tualchhung mite thung chuan Israeli chetlakna chuan Khan Younis khawpui thlang lama humanitarian zone siam al-Mawasi chu dengfuhin a tlaknaah pawh khuar metre sarih zeta thuk a siam tiin an sawi ve thung.
“Mi sawmliin nunna an chan a, mi 60 chuangin hliam an tuar bawk a, mi tam tak in chim hnuaiah an la tang mek” tiin Hamas’s Civil Defence authority operation director chuan a sawi.
Mita hmutute chuan al-Mawasi area-ah thil puak ring tak zanlai pelh hretah hriat a ni a, chumi hnu lawkah kangmei nasa takin a zui nghal a ni tiin an sawi.
Khaled Mahnoud, charity volunteer chuan a thainte nen thil puak awmna chu an pan nghal vat thu sawiin mahse chhiatna thleng turu lutuk chuan a tihamhaih takzek tiin a sawi a.
“Missile-in metre sarih zeta thuk lei tikhuarin puan in kaih 20 lai a phum tel nghal bawk a ni” tiin Mahmoud chuan a sawi.
Video tihchhuah zuiah civilians te chuan airstirke avanga tuarte chhanchhuah tumin an kuta lei an hai lai te tihlanin a awm bawk a.
Israeli Defense Forces (IDF) thupuangtu chuan military te chuan Khan Yunis chhunga Humanitarian Area atanga Hamas terrorists te command leh control centre lian tham tak an bei tiin an sawi ve thung.
“Strike kalpui a nih hmain civilians tena an tawrh loh theih nan ber hmalakna kalpui niin ralthuamah pawh precise munition hman niin aerial surveillance te pawh tih vek a ni” tiin IDF thupuangtu chuan a sawi a.
“Gaza Strip-a terrorist organizations te chuan systematic takin civilian leh humanitarian infrastructure te chu an bei zui reng a. Humanitarian Area te chu State of Israel leh IDF sipaite beih nana terrorist activity tih nan an hmang a ni” an ti bawk.
Hamas te chung chuan Israel sipaite puhna chu hnawl thungin an beih laiin an fighter pakhatmah an awm lo tia sawiin Israel thuchhuah chu ‘dawt muhlum’ tiin an sawi ve thung.