Gaza damdawi in beihnaah chanchinbumi pathum thi

Gaza damdawi in beihnaah chanchinbumi pathum thi
Israeli-ten Gaza City-a al-Ahli damdawi in an kahnaah mi panga an thi a, an zinga pathum hi chanchinbumi niin damdawi in enkawltu, Anglican Church-in an sawi.
Episcopal Diocese of Jerusalem chuan chanchinbumi thi zinga pakhat hi a fapa zai tura hruaitu a nih thu a sawi a. Ningani tuka beihnaah hian mi dang pakhat a thi bawk tih an sawi.
Beihna thleng hi ‘na takin an dem’ tih an sawi a, a bul hnaia lo awm mi 30 hliamin an zingah damdawi ina thawk mi pathum an tel a. Palestinian Journalists’ Syndicate chuan Israel hian ‘chiang takin indonaa dan an bawhchhia’ niin an sawi.
Israeli sipaite erawh chuan damdawi in hi Palestinian Islamic Jihad (PIJ) fighter-in command centre-ah hmangin chu chu an bei tih an sawi thung.
Ningani vek khan khawvel huap chanchin thar puangtu leh pawl 130 chuangin Gaza-a thil thleng report theih leh Palestinian chanchinbumite humhim an duh thu an sawi.
Israeli sipai emaw, sorkarin emaw a la chhang lo va. A hma zawng kha chuan sipaite hian chanchinbumite an bitum ngai lo niin an sawi tawh thin thung.
Palestinian Journalists’ Syndicate chuan Israeli kahna hian al-Ahli damdawi in hung chhunga chanchinbumite puan in tak a tum niin an sawi.
Video thehdarhah chuan damdawi thiam leh mi dangten khawlaia let hliam tuarte chu an bawihsawm tih a lang a, mi pali vel puan inah an dah lut.
“Israeli drone hian kan thawhpuite hi a rawn bei thut mai a ni,” tiin Palestinian chanchinbumi, Mohammed Ahmed chuan Reuters news agency a hrilh a. “Pathum an thi a, a bul hnaia mite an thi teuh bawk,” a ti.
“Israeli sipaite hian chanchinbumite min bei tam tawlh tawh a, kan hna kan thawhnaah hian himna neih kan duh a ni,” a ti.
Chanchinbumi thite hi Ismail Badah, PIJ hnuaia Palestine Today TV channel-a cameraman; Soliman Hajaj, Palestine Today editor leh Samir al-Refai, Shams News network te an ni.
Chanchinbumi paliin hliam an tuar bawk a. An zinga pahnih hi Palestine Today correspondent Imad Daloul leh Ahmed Qalja an ni a, Qatar-a Al-Araby TV cameraman a tel bawk a, an dinhmun a tha vak lo.