Gaza damdawi inte rapthlak khawpin a chhia – WHO

Gaza damdawi inte rapthlak khawpin a chhia – WHO
World Health Organization (WHO) chuan Israeli-ten thlawhna atanga an hmunpui an beih hnuah Gaza-a damdawi inte dinhmun chu ‘sawi fiah phak baka chhia’ a nih thu a sawi.
Thupuangtu, Dr Margaret Harris chuan damdawi in leh a thawktute chu ‘beih hnuah beih leh’ thin an ni tih a sawi a, damdawi pawh Israel-in a kalna a dan avangin a awm mang lo tih a sawi.
Pathianni khan Gaza City-a al-Ahli hospital thawktute chuan Israeli-ten an laboratory leh emergency room an tichhia tih an sawi a. Thi an awm sawi lo mah se naupang a thi nia hriat a ni.
Israeli sipaite chuan Hamas-ten ‘command-and-control centre’ atana an hman an bei niin an sawi ve thung.
Church of England-in an enkawl damdawi ina an bishop-te chuan Palestinian-ten hrehawm leh lungngaihna nasa tak an tawk a, Israel-in an beih chhan an sawi chu a finfiahna pe turin an ti bawk.
Gaza-a inkahhai a tawp atangin Israel hian chawlhkar li chhung chu thlawhna leh lei lamah a bei chhunzawm leh tawh a. Sipai chakna hmanga an beih hi Hamas-in mi an la hrente an chhuah phahna tur niin an sawi.
Al-Ahli hospital hi missile pahnihin Pathianni zan lai velah a fuh a, indona a chhuah hnua vawi nga beih a tawhna a ni.
Jerusalem-a Anglican Diocese chuan genetic laboratory chhawng hnih chu a chhe vek a, pharmacy leh emergency department building pawh a chhia a. St Philip’s Church telin a bul vela in ding dang pawh a chhia tih a sawi.
Diocese chuan Israel sipaite hian thawktu leh damlote chu insaseng turin minute 20 chiah hun an pe niin a sawi.
Thi an awm lo va; mahse, an insasengna lamah naupang pakhat, a lua hliam nei sa chu a thi nia sawi a ni.
A hnuah WHO Director General Dr Tedros Adhanom Ghebreyesus chuan al-Ahli director-in agency biain emergency room, laboratory, emergency room X-ray khawl leh pharmacy a chhia tih a hrilh tih a sawi.
Damlo 50 chu damdawi in dangah an sawn a, a na zual 40 erawh sawn theih an ni lo tih a sawi bawk.
“Damdawi inte hi international humanitarian law hmanga venhim a ni a, beih thin hi tawp nghal rawh se. Damlo, thawktu leh damdawi inte hi hum an ni tur a ni tih ka sawi nawn leh ang,” a ti.
Israeli foreign ministry erawh chuan ‘building pakhat, Hamas-ten firgiaka chet nana command & control centre-a an hman chauh an bei’ tih an sawi a, an beih hmunah hian ‘damdawia inenkawlna lam tih a awm lo’ tih an sawi thung.
‘Hma takah inralrinna’ an pe chhuak bawk niin an sawi.
WHO aiawhtu, Dr Rik Peeperkorn chuan tunah chuan al-Ahli-ah hian damlo dah luh thar theih a ni rih lo tih a sawi.
March 23 khan Israeli sipaite hian chhim lama Khan Younis khawpuia Nasser hospital-a surgical department beiin Hamas finance chief Ismail Barhoum leh mi dang pakhat an that.
Hamas chuan Barhoum-a hi a hmaa Israel-in a beihna avanga hliam enkawla awm a ni tih an sawi a. Sipaite erawh chuan damdawi in hi ‘firfiaka chetna tur thupek chhuah nana hman’ niin an sawi thung.