Ukraine-a zin turin Zalensky-a’n Trump-a sawm

Ukraine-a zin turin Zalensky-a’n Trump-a sawm
Ukrainian President Volodymyr Zelensky-a chuan Donald Trump-a chu Russia nena an indona titawp tura inremna a siam hmain an ram tlawh hmasa turin a sawm.
“Khawngaih takin thutlukna leh indawrna kalpui hmain mipui, civil mi, pasaltha, damdawi in, biak in, naupang na tuar leh thi te hi lo kal la, lo en ve phawt rawh,” tiin Zelensky-a hian CBS-a 60 Minutes-a an kawmnaah a sawi.
An kawmna hi Pathiannia Russian missile-in Sumy khawpui kapa mi 34 an thihna leh mi 117 an hliam hmaa mi kha a ni.
Finfiahna sawi chuang lovin Russia hian Iskander missile pahnih hmangin Ukrainian sipaite thukhawm an kap a, 60 an thi niin a sawi a. Trump-a hnenah hian tihpalha kah a nih thu an hrilh a, tuin nge hrilh tih erawh hriat a ni lo.
Russia-in Sumy-a conference centre an beih nia an sawi hi a chhe vek a, a khuar duk a, a chung pawh hmuh tur a awm tawh lo.
Kyiv chuan sipai officer-te an thukhawm tih a la sawi lo va, Sumy mayor erawh chuan hetiang thutkhawm hi an lo phalsak a nih chuan tual chhung venhim hna thawktu hotute chu an bân ngei a phut tih a sawi.
Sipai awm khawm hi Russia-in a bitum chat zel a. Ukraine a beih tawh chinah a uar hle a, hei hi civil mite pawhin an tuar thin hle a ni.
Sumy beihna a thlen mek lai hian Ukraine thawhpui, US chuan kum li indo kalpui tawh titawp turin hma a la mek a, Trump-a kaihhruaina hnuaiah indawrna a kal mek.
Hemi chungchang an zawh chuan US president hian ‘rapthlak’ tiin a sawi a, ‘tihpalha tih’ a nih thu a sawi bawk a, a sawi thui lo thung.
A hmain Trump-a’n Ukraine-a a special envoy Lt-Gen Keith Kellogg chuan he beihna hi chu ‘thil mawihnai lo tak’ a nih thu a sawi thung.
Zelensky-a’n a sawmna hi Trump-a pawhin a pawm ngei rin a ni.
US Treasury Secretary Scott Bessent-a chu Trump-a sorkara mi pawimawh zinga Kyiv tlawhtu awm chhun la niin ani pawh hi Washington-in sipai thila a puih zel theih nan Ukraine leilung hausaknate US-a hralh tura Zelensky-a ziahpui tuma zin a ni a. Zelensky-a hian a duh lo nghe nghe.
Ukrainian president hian Russia-in civil mite a beih zel laiin Trump-a chuan inkahhai a awm theih nan Moscow a hnaih zel niin a sawi bawk.
Pathiannia missile-a kah an ni kha kumina Ukraine-a civil mite beihna lian ber a ni.
April 4 khan Russian missile hmanga Kryvyi Rih kahnnaah mi 20 thiin mi 61 an hliam tawh bawk.
Russia-a defence ministry chuan Sumy-a an beih hi ‘unit commander leh khawthlang ram mite’ thingpui dawra an thutkhawm lai niin a sawi a, finfiahna a awm lo thung.
February 24, 2022 atanga Russia-in Ukraine a beih hnuah lehlam lehlamah mi za tel thiin sang tel an inhliam a, a tam ber hi sipai an ni.
UN chuan Ukrainian maktaduai sarih vel zel an raltlan mek niin a sawi.
An buaina hi kum 2014-a Ukraine-a Russian president tantu paih thlak a nih atanga intan kha a ni a. Hemi hnuah hian Russia-in Black Sea peninsula Crimea luahin Ukraine khawchhak lama helho an thlawp bawk.