Gaza Strip-ah ei tur thlak, puihna phur lut tan ta bawk

Gaza Strip-ah ei tur thlak, puihna phur lut tan ta bawk
Israel-in Gaza-a tamna nasa tak a awm avanga inkahna a tawpsan hnuah Jordan leh UAE chuan puihna thil a thlak tan.
Jordan-a sipaite chuan UAE nena tang dunin an thlawhna hmangin Pathianni khan tum thum tonne 25-a rit puihna an thlak tih an sawi a. Egypt atangin lorry a lut bawk a Jordan atang pawhin a lut thuai dawn.
Israel hian Pathianni khan Gaza-ah puihna pek luh a nih theih nan ni khatah darkar 10 chhung sipai chetna an chawlhsan dawn tih an sawi.
Hetih lai hian damdawi ina thawkte chuan Gaza lailia puihna phurtute kalkawng bula Israeli-te silai hmeh puahah mi pakua thiin mi dang 54-in hliam an tuar niin an sawi a. Inrinnia inbeih chawlhsan tan hnu lawkah thlawhna hmangin chenna hmun kah a ni bawk nia sawi ani.
Salah al-Din Street-a Netzarim Corridor-ah UN puihna phurtu lo changte kah hlum nia sawi a ni a. Nuseirat-a al-Awda Hospital damdawi in panpui ni mah se pakua an thi niin damdawi in thuneituin a sawi.
Israel Defense Forces (IDF) chuan an sipaite hian ‘pungkhawm zingah anmahni pantu nia rinhlelhawma awm tihthaih nan chauh’ silai an hmet puak a, tumah tihnat an tum lo niin an sawi thung.
Ei tur phur truck-te chu strip-ah hian Pathianni khan lutin Gaza hmar lama ei tur semna hmun, Zikim-ah riltam taka lo awm tawh Palestinian-te chuan chhangphut bag-te chu lirthei atang hian an hlang thla.
Israel hian hun rei tak puihna lut a khuahkhirh avangin Gaza-ah hian mi tam tak an tam a, khawvel ram hrang hrangin luhna hawng turin an kar nasa hle.
UN World Food Programme chuan Gaza-a mihring maktaduai hnih zinga pathuma pakhat zel chu ni tam tak ei tur nei tawh lo niin hmun lia thena hmun khat chu ‘tampui mitthi tuar’ ang an nih thu a sawi.
Hamas hnuaia health ministry chuan tun hnaiah ei tur kham neih loh vangin mi 100 chuang an thi niin an sawi bawk a. Israeli leh US thlawp Gaza Humanitarian Foundation (GHF) hmanga ei tur semna hmunah ei tur lak tum mi za tel kah hlum an ni bawk.
Puihna a luh tan mek lai hian ram hruaitu tam tak chuan tam zawk a luh theihna tura ruahmanna siam an la phut a. UN high commissioner for human rights Volker Türk phei chuan indo tihtawpna tur ngaihtuah turin khawvel ramte a ngen.
US President Donald Trump-a chuan Gaza-ah puihna tam zawk an thawn tur thu puangin US buaina chauh ni lovin khawvel buaina a nih thu a sawi.
Gaza-a puihna a luh mek lai hian Israeli prime minister chuan an ram chuan ‘a bei zel dawn a, kan tum kan hlen hma kan kal zel ang’ tih a sawi.
Israel-in Gaza-a puihna luhna tur hian ni tin Gaza-a mihring chen tamna laiah beihpui an thlak thin darkar 10 zel chawlhsanin puihna luh theihna turin kawng a hawng dawn a. Kawngte hi zing dar 06:00 leh zan dar 11:00 an hawng thin ang.
Sipai chetna hi Al-Mawasi, Deir al-Balah leh Gaza City-ah chawhma dar 10:00 atanga zan dar 08:00 an chawlhsan zel dawn bawk.
Israel hian Jordanian leh UAE ruahmanna, UK-in a thlawp bawk, Gaza-a thlawhna hmanga ei tur thlak pawh kalpui turin a ti a ni.
Israel hian October 7, 2023-a Hamas-in an ram beia mi 1,200 chuang an thah leh hren tura mi 251 an hruai phuba lak nan Gaza hi a bei a. Tun thlengin Gaza-ah hian Palestinian 59,000 chuang an thi tawh niin Hamas health ministry chuan a sawi.