Gaza vang pawha Asian Cup hawn tum ruh Palestina team

Hamas hoin Israel rama an pawikhawih nghawng kal zel kan hria a, hun khirh takin Gaza Strip a chimbuai mek laiin Doha khawpuia AFC Asian Cup khel tur Pales-tine squad meber 26-te chuan Qatar an thlawklut tawh a, Gaza chhiatna tawp hlei thei lo avangin he team hian Asia khaw-mualpui huap football inelna lian berah hlawh-tlinna chang turin thawhrim zual an tum.
Palestine hian naktuk, Pathianniah Asian power-house Iran hmachhawn chungin tournament bul an tan dawn a, knockout stage luh tuma an beihna kal zelah United Arab Emirates leh Hong Kong an su zui leh ang.
Palestinian squad hian Gaza Strip-a an chipuite tawrhna hre reng chung leh Israel kut tuar mekte chawimawina atan a vawikhatna’n Asian Cup hawn ngei an tum tih an sawi a, kum 2015 atanga he tournament khel tan ve chauh team hi champion zo tak ang maw?!
Palestinian health authority chuan thla thum chhunga an chet tawhnaah Israel-in mi 23,000 an tihlum tawh niin an sawi a; Hamas firfiakte’n nikum October ni 7-a Israel ram luta an hmuh apianga thata mi 240 lai an man tum khan Israeli official-te chuan mi 1,200 tihhlum an nih thu an lo puang tawh a ni.
Israel phuba lakna a la kal mek laiin Palestine football team chuan Asia khawmualpui huap mipa football team inelna hmachhawn turin Qatar an pan a, Ningania media an hmachhawn tumin midfielder Oday Kharoub chuan Reuters hnenah Doha khawpui atangin Palestine mipuite hnenah thuchah tihchhuah an duh tih sawiin, an hmachhawp hmasa chu second round luh phawt a nih thu a sawi.
Kharoub hian hun khirh tak an tawh mek thu leh Gaza lama chhungte nei player-te tan a harsa zual tih a sawi a, training chawlh laia news an hriat kal zelte chuan training lamah pawh duh angin rilru a pektir thei lo tih leh an in lama thil thleng mek avangin tournament lama insawrbing pawh a harsa tih a tarlang tel a, “In lama kan mite kan hre reng a, an tana tawngtai bak tih theih kan nei lo a, mahse, group stage paltlanga round sang zawk kan luh chuan hlimna chhete kan siamsak ngeiin kan ring,” a ti.
Defender Mousa Farawi pawhin Gaza lama thil thleng mek avangin tumruhna leh ngawl-tawtna sang zawk nen an bei dawn tih a sawi a, an theihna sangbera khel chhuak thei turin Pathian pawhin a tanpui ngei a beisei thu leh Palestine-in second round an luh chu Pathian duhdan pawh a nih a rin thu a sawi.
Defender dang Yaser Hamed pawhin player dangte sawi dan ang deuh bawkin Pales-tina rama thil thleng avangin team pumpuiin tumruhna, thathona leh chak duhna sang zawk an neih mek thu leh an chhungte’n hun harsa tak an tawh mek thu a sawi a, anni erawh professional player an nih ang takin tunhnai chawlhkar engemawti chhung chu an kal ngai rengin an kal tih a tarlang tel.
Palestine hmelma lian ber Israel hi kum 1964 daih tawh khan a thlengtu ni chungin Asian Cup champion an lo ni tawh a, mahse, politik thila innghirnghona thleng reng avang leh Middle East ramte’n Asia khawmualpuia Israel beh ve ngai thei loa boycott hial an thlentir tak avangin kum 1994 khan Israel chu AFC atangin an inpuchhuak ta nge nge a, European confederation UEFA an zawm ta zawk a, Europe champion nih meuh erawh an tlin rih bik lo chu a nih hi!