Geneva-a Iran leh US inbiak thawh hnihna zo

Tehran-in nuclear programme a neiha an inrem lohna sawi fel tuma Swiss khawpui, Geneva-a Iran leh US inbiak thawh hnihna chu a tawp ta.
Iranian Foreign Minister Abbas Araqchi chuan ram pahnihte hi ‘kalphung inhruainaah’ an inrem tih a sawi a; mahse, chin fel ngai a la awm tih a sawi a. US erawh chuan engmah a la sawi ve lo.
Washington-in Iran hi an sorkar laka lungawi lohna lantirtu mipuite chunga a chet dan avanga a vau hnu leh nuclear a sawngbawl dana a lawm loh avanga sipai chakna nena an inep hnuah inbiakna hi an kalpui a ni.
An inbiak tan hma lawk hian Air Force One-a chuang chungin US President Donald Trump-a chuan Iran hian inremna siam an duh tih a sawi.
Tehran-a foreign ministry chuan nuclear chungchanga US tanna chu ‘a tak tak zawka’ kalpui a nih tur thu a sawi.
Oman kaihhruaia Thawhlehnia inbiaknaah hian Iran chuan nuclear programme leh US-in eibara a hrekna hlihna tur lam bikah an insawrbing dawn tih a sawi bawk.
Washington hian a hma khan Iran-in missile a puah telin an inkara inrem lohna leh tha taka sawiho an duh tih a sawi ve bawk.
Trump-a chuan an inbiakna hi ‘pawimawh tak’ tia sawiin amah pawh ‘indirect-in’ a tel thu leh Tehran pawh inremna awmna turin a phur hle niin a sawi.
Trump-a hian a hma khan Middle East-ah a sipaite chhawpin Iran hi a vau nasa hle a. BBC Verify chuan US aircraft carrier USS Abraham Lincoln pawhIran bul maiah a inhung niin a sawi.
US hian khawvela indo thlawhna phurtu lian ber, USS Gerald R Ford pawh Middle East-ah a thawn a, chawlhkar thum hnuah a thleng dawn nia sawi a ni bawk.
Thawhlehni khan Iranian supreme leader Ayatollah Ali Khamenei-a chuan Trump-a’n sipai chaknaa a vau chu chhangin, “Indo thlawhna phuur thei aia hlauhawm chu tuipui mawnga tlaktir thei ralthuam a ni a. US sipai hi khawvela chak ber tiin a sawi a. ‘Khawvela sipai chak berte hian’ puibawm theih lek lohva na an tawng fo,” a ti.
Khamenei-a hian US hian inbiaknaa hlawhtlin a tum luatah mi a vau nia sawiin ‘a dik lovin a atthlak hle’ tih a sawi.
Iranian Foreign Minister Araqchi-a chuan Thawhtanni khan UN nuclear watchdog chief a hmu bawk a, Geneva-ah hian ‘inremna dik leh intluk tawk siam turin’ a kal tih X-ah a tar lang.
Iran hian US-in a sipai a chhawpte chhan nan hian Thawhtanni khan Islamic Revolutionary Guard Corps (IRGC)-in Oman leh Iran inkara Gulg-ah, Strait of Hormuz-ah nunchan an zir.
Strait hi khawvela tuikawng pawimawh ber pawl niin Gulf Arab ramten tuialhthei an thawn chhuahna kawng ber a ni.
Iran leh US hi Oman-ah kum tir khan an lo inbe tawh a, hemi tum hian Araqchi chuan ‘bul tanna tha tak’ tiin a sawi.