German-ah Israel te beih tum man

German khawthlang lama khawpui pakhat Duisburg hmuna police duty te chuan thawhlehni khan a ruk a rala chet tum mi pakhat an man thu an sawi.
German chanchinbumite sawi dan chuan he an mi man pa hian Israel tanna lam lantir tute beih a tum niin an ngai a ni. Police te chuan mi pakhat midang beih tuma ngaih theih chu ama chenna in Duisburg atanga an man thu an sawi a.
He khuaa police duty te chuan he an mi man hi police te hmelhriat sa niin midang beih tuma inbuatsaih mek a nih leh nihloh chu enfiah mek a nih thu an sawi bawk a ni.
German media ten an report danin mipa kum 29 a upa Tarik S. ni a finfiah tawh niin, hepa hi Islamic State-a membership a nih avangin kum 5 chhung lungin tang tura tih a lo ni tawh a. Chanchinbu hrang hrang te report dan chuan amah hi German leh Egyptian mi niin Israel tan zawnga pungkhawm te beih tuma puh a ni.
German rama kar tin chhuak magazine Der Spiegel leh nitin chanchinbu Bild te report dan chuan German foreign intelligence service atangin police te chuan hriattirna an dawng a.
He hriattirna chiang tak atanga report a nih danin kum 29-a upa chu Risk Prevention Act hmanga man a nih thu an sawi a ni.
He pa hian internet atangin Israel tantute zawng thinin jihadist te thurawn a pe thin a, a mi beih tum te a ti hlau hmasa thin niin an sawi a ni. He an mi rinhlelh pa hian Israel tan avanga pungkhawm beih tur bik thlan chhuah a nei em tih rang taka hriat mai theih a nilo a.
Thawhlehni tlaia Duisburg police te sawi danin an mi rinhlelh pa hi a nihna chiang tak hriat a nihloh thu an sawi. Der Spiegel sawi danin kum 2013 tawp lam khan Tarik S. hi Turkey kal tlangin Syria ah a kal a, Islamic State group zawmin heta tanga kum 3 hnu-a a lo kir lehna ah Frankfurt airport ah man a lo ni tawh a ni.
Germany ram ang bawkin khawvel hmun hrang hrangah Israel leh Hamas te indona karah pawh Israel tantu leh Palestine tantu te punkhawmna hi a awm reng a, hei hi remchangah la in anmahni dotu te hian heng pungkhawm te beih hi an tum ve reng bawk a ni.