Germany an chak, Argentina an chak lo

Germany an chak, Argentina an chak lo
Hmeichhe World Cup khelh mekah Germany chuan tha takin bul an tan a, an khingpui Morocco chu si ruk fai ngawtin an sawp. Nuamsa taka Germany an chak laiin Argentina erawh chu Italy hneh lovin an tlawm nghal thung.
Football ram ropui Germany hian Melbourne Rectangular Stadium-a an khingpui Morocco lakah tha zetin bul an tan a, minute 11-na lekah Alexandra Popp chuan hmahruaina goal a thun nghal. Hmahruaina goal thuntu Popp hian minute 39-naah an goal hnihna a thun zui leh a, si hnih faia hmahruai chungin chawlhlawk an hmang.
Chawlhlawk hnu lamah Germany in goal an thun belh leh thuai a, minute 46-na lekah Klara Bühl chuan an goal thumna a thun. Si thum fai ngawta an hnufual hnuin Morocco player Hanane Aït El Haj leh Yasmin Mrabet ten an lamah ti-goal zawnin an buaina an belhchhah a. Si nga fai ngawta hma an hruai hnuin Germany goal hnuhnung ber hi minute 90-naah Lea Schüller-i’n a thun zui ve leh a. Nuamsa taka hnehna changin point thum an hlawhchhuak zui ta a ni.
Germany in Morocco an sawp lai hian Eden Park, Newzealand-a Italy leh Argentina an inhmachhawn ve thung. Football atchilh ram pahnihte hi an inhnehtawk viau a, goal pawh a lut har hle. Hun tawp dawn hnaih minute 87-naa Cristiana Girelli goal thun hmangin Italy an chak hram a, fiahna hautak an paltlang. Group A-ah hian Sweden chuan South Africa an lo hneh ve tawh bawk.