Germany an chak awlsam

Inrinni zan khan UEFA Nations League 2024-25 khelh chhunzawm a ni a, ram lian Germany leh Netherlands ten nuamsa takin hnehna an chang a, goal 5 ve ve an thun. Germany hian an mikhual Hungary an sawp a, Netherlands in Bosnia and Herzegovina an sawp ve bawk.
Euro 2024-ah beisei anga thleng sang thei ta lo Germany hian Merkur Spiel-Arena-ah Hungary an mikhual a, League A, Group 3-a an match hmasa ber an khel. An mikhual lakah an khel tha viau a, goal 5 ngawt an thun. Goal nga an thunte hi chawlhlawk maa goal khat an thun leh chawlhlawk hnu lama goal li an thun a ni. Germany tan hian West Ham United forward thar Niclas Füllkrug chuan minute 27-naah hmahruaina goal a thun a. Fullkrug goal thun hmang hian si khat faia hmahruai chungin chawlhlawk an hmang.
Chawlhlawk hmain goal khat chauh thun mah se chawlhlawk hnu lamah Germany an khel tha leh zual a, Hungary lakah German ral lian an hrang leh zual. Mualneitu Germany tan hian Bayern Munich forward Jamal Musiala chuan minute 58-naah an goal hnihnaa a thun a, an hmahruaina a tizau. Musiala goal thun hnu lawk hian Florian Wirtz chuan minute 66-naah an goal thumna thunin an hmahruaina an tihzau belh.
Si thum fai ngawta hmahruai tawh Germany in an duh tawk mai lova, goal hnih an thun belh leh. Minute 77-naah Aleksandar Pavlovic chuan an goal lina a thun a. Hun tawp dawn hnaih minute 81-naah Arsenal forward Kai Havertz chuan penalty atangin an goal ngana a thun a, a tawp a khar. Havertz goal thun hnu hian goal dang a luh belh tawh lova, Germany chuan an mualah 5-0 in hnehna an chang a, awlsam takin point thum an hmu.
Group 3-a inkhel dangah Netherlands chuan an mikhual Bosnia and Herzegovina chu 5-2 in an hneh a, awlsam takin point thum an hmu ve bawk.
Netherlands hian an mikhual Bosnia lakah bul an tan tha a, goal an thun har lo. Minute 13-na lekah Manchester United forward thar Joshua Zirkzee chuan hmahruaina goal a thun. Zirkzee goal thun hnu hian Bosnia an khel tha a, an si phurh an sut thuai. Bosnia tan hian Ermedin Demirovic chuan minute 27-naah goal thunin an si phurh a sut. 1-1 a an inhnehtawk reng hnuin chawlhlawk dawn hnaih minute 45+2-ah Tijjani Reijnders chuan Netherlands hmahruai letna goal a thun a, 2-1 a hmahruai chungin chawlhlawk an hmang.
Chawlhlawk hnu lamah Netherlands an khel tha chhunzawm a, goal thum an thun belh leh. Minute 56-naah Cody Gakpo chuan an goal thumna thunin an hmahruaina a tizau. Gakpo goal thun hnu hian Bosnia in an chhang let zui ve leh nghal. Edin Dzeko chuan minute 73-naah goal thunin an si phurh a sut then ve leh. Dzeko goal thun vangin Bosnia hi phur thar viau mah se an phur rei lova, goal hnih an chhuah belh. Netherlands tan hian Wout Weghorst leh Xavi Simons ten goal an thun belh leh a, an mualah 5-2 in hnehna an chang zui ta a ni.
League A, Group 3-ah 5-0 ngawta Hungary hnehtu Germany in hma an hruai a, Ntherlands in pahnihna an luah. Germany leh Netherlands te hi group champion nih tumin an inel zui viau tura ngaih a ni.