Germany captain thar Kimmich
Germany national team head coach Julian Nagelsmann chuan Thawhtanni khan international football chawlhsan ta Manchester City midfielder Ilkay Gundogan thlaka Germany captain thar ni turin Joshua Kimmich a ruat a, he mi rual hian Real Madrid centre back Antonio Rudiger leh Arsenal forward Kai Havertz-te chu vice-captain atan a puang nghal bawk.
Kum 33-a upa Gundogan khan Euro 2024-a mualneitu team Germany game nga khel kim vekin, quarter-final lamah champion zui ta Spain an hneh lo a, ram tana match 82 a khelh tawh duhtawkin international football a chawlhsan ta a, kum 29 miin a thlak dawn ta a ni.
Kum 2016-a ram tana khel tan Kimmich hian national team team tan game 91 khel tling tawhin, Inrinni Nations League match-a Dusseldorf khawpuia Hungary an mikhual hunah a mawhphurhna thar nen khelmual a lut tan ang a, ni thum hnuah captain thar ho hian Dutch-ho luhchilhin Amsterdam-ah an innuai zui leh ang.
A captain thar tur a puan hnua reporter-te’n an kawmnaah Nagelsmann chuan captain thlanna chu a mimal ngaihdan chauh a nih loh thu sawiin, coaching team tela team pumpui duhdan tlanglawn a zawn thu leh an thlanchhuah tak chu hruaitu ni tura hualawm ber, team rilru kaihruai thei ber tura an ngaih a nih thu a sawi a, player pathum vel an buk kual thu a tarlang tel.
Thla hmasa bawk khan Manuel Neuer pawh international football atanga a kalbo ve tak avangin kum 32 mi ni tawh Barcelona captain Marc-Andre ter Stegen chu Germany number one goalkeeper atan ruat a ni a, Ter Stegen hian ram tan match 40 a khel tling ve tawh.
Kum 38 mi Neuer hian kum 2009 atanga ram tana khel tanin, a chawlh thleng khan national duty hian tum 124 a fehchhuak hman a, 2014 World Cup-a a ram a champion-pui tumn khan goal-veng thiam ber chawimawina ‘golden glove’ a lo dawng tawh a ni.
Number one goalkeeper thar chungchang sawiin Nagelsmann chuan, “Marc hi number one a ni ta a, he nihna hi a phu ve reng a ni. Kum tam tak chhung a lo khel tha mar tawh a, kum engemawti chhung Barcelona captain a ni tawh bawk a, a khelh that theih em avang hian midangte tana thik rual lohin number one nihna hi a chang lo thei lo a ni.
“Kan kiangah hian hlenchhuah tur hna a la nei a, chu chu number one a luah chhoh chhan pawh a ni,” tiin.
Nations League khelh chhoh leh tur League A Group 3 lamah Germany hian tunkar tawp lama an tum tur Hungary bakah Bosnia & Herzegovina leh Netherlands an hmachhawn ang.
Germany squad
Goalkeepers: Marc-André ter Stegen (Barcelona), Alexander Nübel (VfB Stuttgart), Oliver Baumann (Hoffenheim)
Defenders: Waldemar Anton (Borussia Dortmund), Benjamin Henrichs (RB Leipzig), Joshua Kimmich (Bayern Munich), Robin Koch (Eintracht Frankfurt), Maximilian Mittelstädt (VfB Stuttgart), David Raum (RB Leipzig), Nico Schlotterbeck (Borussia Dortmund), Jonathan Tah (Bayer Leverkusen)
Midfielders: Robert Andrich (Bayer Leverkusen), Emre Can (Borussia Dortmund), Chris Fuhrich (VfB Stuttgart), Jamal Musiala (Bayern Munich), Aleksandar Pavlovic (Bayern Munich), Angelo Stiller (VfB Stuttgart), Florian Wirtz (Bayer Leverkusen)
Forwards: Maximilian Beier (Borussia Dortmund), Kai Havertz (Arsenal), Niclas Fullkrug (West Ham United), Deniz Undav (VfB Stuttgart)