Germany khawpui hrang hranga Euro 2024 khelh mek chu Nilai zan atang khan round 1 khelh tan a ni a, inelna thlengtu Germany chu last 16 lut hmasa ber an ni. Germany in last 16 an luh chian lai hian Hungary erawh chu tla chiang tluk an ni ve thung. Nilai zana inkhel dangah Croatia chu Albania lakah an chak zo lova, an dinhmun a him ta lo hle.
Germany an hmuhjnawm zel
Inelna thlengtu Germany leh Hungary te hi Stuttgart Arena-ah an inhmachhawn a, bul tan tha Germany an hmuhnawm chhunzawm. Scotland laka an khelh that ang em emin Germany hian khel chhuak zo tawh lo mah se, last 16 lut tura an mamawh point thawkchhuak turin si hnih faiin an chak.
Champion tura rinkai Germany hian Hungary lakah bul an tan tha a, goal an thun har lo. Minute 22-naah player hmuhnawm Jamal Musiala chuan fuh takin a pet goal a, hmahruaina goal a thun. Hma takah goal an thun vangin Germany hi inrintawkna sang zawk nen an inlan chhunzawm a, khel tha thawkhat viau mah se goal erawh an thun belh thei mai bik lo. Goal lut a awm belh theih loh reng hnuin Hungary in goal thunin an si phurh an sut zet a, VAR rawn a nih hnuin he goal hi hnawl a ni.
Ball tam tam zawk ni chunga goal an thun belh theih loh reng hnuin Germany Captain Ilkay Gündogan chuan Maximilian Mittelstädt siamsak tha tak chu lei hrulah chiang zetin a pet goal a, an hmahruaina a tizau. Gundogan goal thun hnuin goal dang a luh belh thei lo va, Germany chuan 2-0 in hnehna an chang zui ta a ni.
Hungary lakah an chak vangin Germany hian point 6 an hmu a, last 16 lut chiang hmasa ber an ni. Germany in last 16 an luh lai hian khelh hnih tlawm zawn tawh Hungary erawh chu tla tluk an ni tawh thung. Hungary hian an hmachhawn leh tur Scotland an sawp nek a nih chauhin last 16 luh beiseina an nei zui thei a ang. Group A a inkhel dangah Scotland leh Switzerland te 1-1 in an inhnehtawk.
Nilai zana inkhel dangah Croatia an chak zo lova, tlak an haih ta hle.
Germany in last 16 an lut
Get real time updates directly on you device, subscribe now.