Zofate tana Volleyball Arsi lian Vardingi (Dingdingi) a chawl ta

By : Rohlupuia Renthlei
Pian leh murna: Hun engemaw chen a liam tawha, mizoramah chuan thlasik vanglai, khaw vawh zual lai tak a ni ti ila, a dik awm asin. Pawl kut thla, tahrik ni 18 ah chuan zoram mai ni lo, India ram zaupui mai tana hriat reng hlawh tur a ni tih hre hauh loin Kanan Veng, Aizawla cheng, Pu Zosangliana Varte leh Pi Ramnunsangi te nupa chuan an fa lai ta tur a nih hre lawk hauh loin hmeichhe naupang duhawm tak mai an nei a. Lo hre lawk ni se zawng, a laiah hming atan pawh Lalhmingthangi an ti duh hial mai thei asin! Mahse, vawiin thlenga mizoram mai ni lo, India ram chhunga infiammna ngainat hlawh tak mai Volleyball huang chhunga hriatreng hlawh tawh turin, Vardingliani tih hming an chawitir ta a. Vawiin thleng hian Dingdingi hming leh Volleyball hi a inzawm tlat a nih hi.
Volleyball zinkawng: Dingdingi hian naupangte a nihlai atangin infiamna dang zawng aiin Volleyball hi a ngaina zawk a. Kum 10 mi vel a nih chhoh lai hian Aizawl, Kanan vengah chuan Volleyball a lar chho hle a. SAI pum chhuak Mahlimi te, Zothani te lar chhoh tak tak lai rawn nang chhoin, kanan tlanga an volleyball practise na sir velah chuan ball remchang apiang lo khawih kual vein hun a hmang ve thina. Chu chu a nuna volleyball in hmun pawimawh tak a luahna intan chhohna niin, a nunin bung thar a kai chho tan reng mai. Hetihlaia an coach, Pu AC Vanlalhuma chuan a ball khawih vel chu lo hmuin, volleyball zirtir tlak a ni tih hmuin an zinga practise ve thin turin a ti ta nghal a. Pu AC Vanlalhuma leh Laldinliana te kaihhruaina hnuaiah Dingdingi pawhin a aia senior rual karah chuan volleyball a inzir chho ve lauh lauh a. Pheikhawk leh sport dress pangngai pawh nei lo khan a Nu awmhmun rawt pheikhawkte bunin, a u Sneaker lei te pawh a bun chho zel a. A chhungte’n hauh a hnekin an tuipuiin an phurpui em em a. Kawng engkimah an chhawmdawlin an ngaihsak zui em em a, a tan kawng zau tak an hawnsak a ni ber mai. A chang chuan an tuala ko pang velte ben per lauh lauhin, an practise loh karah mahniin theihtawp a chhuah chho a. A nunah volleyball chuan hmun chungnung ber a luah chho ta a ni.
Dingdingi hringnun hi a tluang purh bik hauh lova. An upa ber hian kum 6 mi lek niin accident in a boralsan a. Amah duata, hmangaih em em tu, a pa pawhin kum 1996 khan a hnangaih, a nupui fanaute kalsanin a nupui fanaute chu khawhar taka nun bul tan chho leh turin van kohna a chhansan bawk a ni. Thihna avanga indawm kun mai loin, theih tawpa hringnun hmachhawn chhoin ke an pen ve zel a. Lusun khawharna te kiang lo mahse, hneh theih a ni tih lantirin a inkhel chho zel a. Kum 1998 a lo herchhuah meuh chuan tleirawl te niin, Miss Mahlimi hoin Central YMA buatsaih Volleyball Tournament-ah telin, a vawikhat tournament khelhnaah Champion no mawi chawiin, player hma hun eng tak nei chungin mipui hmelhriat a hlawh chho nghal a ni. Heta tang hian hawikir tawh loin, a dama, a hriselna a that phawt chuan volleyball nena then hran hleihtheih loh khawpin a nunah volleyball chuan bu a khuar chho zel a. Zoram dung leh vang deng chhuakin, volleyball a nih tawh phawt chuan chhungkaw lam atangin dodalna aiin tuipuina leh phurpuina a dawng nasa zawk a, malsawm tlakin a thawkrima, tuipui tlakin a thiam ta a nih hi!
Final khel tura duan: Dingdingi hian kum naupang lam a nih laia tournament a khelh tawhnaa an championna te mumal takin a chhinchhiahin a vawng lo hlauh mai a. Chiang taka a hriat theih chinah ngawt pawh CYMA Tournament ah hian tum6 zet Champion No mawi a chawi tawh a. |um 14 zet Final-ah a inlan tawh bawk a. Inter village lamah pawh record ropui tak neiin, hnuhma duhawm tak a hnutchhiah a ni. Tournament a khelh tawh ho reng rengah Final an luh lohna hi chhiar tham lek chauh a ni. Inngaitlawm takin heng dinhmun sang leh duhawm taka an din theihna chhan hi Pathian hruaina leh a khelhpui te that leh thiam em vang a nih thu a sawi nghe nghe a ni.Club lama a khelh tawhna te hi heng, Kanan Sporting Club, Excise Deptt Sporting club leh 2005-2017 chhung zawng hian Power Department Sporting Club ah a khel a bawk a. Power Deptt SC a a khelh ve chhung hian MVA Tournament ah tum 6 chiah Champion loh an nei a, kan Champion zat tak hi chu record bu te en let a nih ngawt loh chuan sawi mai harsa a ni ta! Hmeichhe PVL hmasa ber, 2017 ah khan Power Dept.SC chu Champion puiin, Best player atana thlan a ni nghe nghe.
Dingdingi hi Volleyball khel tur hrim hrima duan emaw tih mai tur a ni a. A inkhelh hun chhung hian Final a khelh lohna tournament hi chhiar tham lek chauh a ni a. An champion emaw, Champion lo emaw, Final khel tura duan bik niawma mawiin, final khelh loh tum hi a nei mang lo hial a, champion team-a a tel tawhna te pawh chhinchhiah mai harsa zawk a ni. Lawmman hian a um emaw, a bawhin a bawh emaw tih mai turin he a Volleyball zinkawngah hian vanneihna a dawn nasa a. Vanneihna dawng tura a dawn thleng pawimawhzia hretu te tan chuan fak loh phal chi a ni lo!
Mimal Chawimawina lam: Dingdingin mimal chawimawina a dawn hmasak ber chu Central YMA Tournament, kum 17 a nih kuma best spiker atana an thlan kha a ni a. Hemi hnu hian hnunglam hawi tawh loin, mimal chawimawina hian a umin a um a ni hawt e. A inkhelhna zawng zawnga mimal chawimawina awm thei, Best Spiker, Best Player, Most Outstanding Player, Most Valuable Player tih te hi Vawi 20 zet a dawng tawh a. Kum 2012 khan Mizoram External Excellence in Sports Felicitation chuan ‘Outstanding Performance in Volleyball Award’ an hlan a, Mary Kom Aizawl-a a lo kal tum khan he chawimawina hi an hlan nghe nghe a ni. Hei zat chawimawina dawng thei tura a thawhrimna te, a inpekna zozai te hi Mizoram Volleyball ngainatu te tan chuan theihnghilh rual a ni lova, ngaihhlut loh phal chi lah a ni hek lo. Volleyball a khelh chhung hian chawimawina awm thei zawng zawng a dawng kim ti ila, a khelhna position at anga dawn theih zawng zawng chu a dawng kim a ni.
India tân a khel : Kum 2001 khan Dingdingi hian Mizoram tan a khel tan a. Naupang tea mizoram ai a awh theih avang hian Volleyball a thiam em tih hi in zawh fo chi a ni lem lo! A sulhnu hi thlir ila, a khel la hmu miah lo tan pawh hai rual lohin a thiam tih a chiang! Hetih hunlaia anmahni enkawltu, Sir Rina nghe nghe hian, “Mizoram ai tunah chuan i awh thei tawh a. Hetah hian tawp reng reng tum hauh suh ang che. Mizoram mai ni lo, India ram aiawh tgei turin bei fat fat ang che,” tia fuihin, he fuihna hian hma lam pan chaka tuihalna a pe a ni. Mahse, mizoram aiawhin National Junior tournament te zuk khel ve thinin, an bio-data te lo laksak ve thin bawk mahse, India ram tana eng level ah mah khel tura koh zui an hlawh ngai lo! Mi tam tak tan chuan beidawnga kun tlawk tlawkna tham a ni tawh! Mahse, Dingdingi erawh chung beidawnna te chuan hneh zo loin, a tana hun tha her chhuah hun chu a nghak fan fan a. Mizoram tana kum 10 zet a khelh hnuin chu hun tha chu a hmu ta!
India ram zau zia hi kan ngaihtuah ngai em? Khawvela Democracy ram lian berah hian mihring maktaduai tam tak kan cheng a. Chung zing atanga India aiawh tura mi 15 bawr vel thlan chhuah hi thil awlai leh sam khai a ni dawn lo. Mahse, mizoram mai ni lo, North East atanga a hmasa ber(?) ni turin kum 2010 India aiawh tura thlan a ni ta! India ram aiawh tura thlan a nihna kawngah hian a phena mi pawimawh em em, sawi hmaih thiang lo pakhat a awm. Chu chu Miss Mahlimi a ni. Miss Mahlimi chu India coach ni tura koh a ni a. Chutihrual chuan anin MVA lamah selection trial tura player tir nghal turin a hriattir a. Bei nge sei Run dung tiin, Dingdingi chu tirh thlak a ni ta a. Gandhi Nagar, Gujarat ah tum hnih trial neih tur a ni a. Hemi tum pawh hian vawikhat trial chiah a zuk nang hman a. Final selection hmachhawn chho tur zingah vanneih tjlak takin a tling chho ta a. India camp a zawm chu a ni ta reng mai!
India Camp-a awm ngawt hi India aiawhna tur a la ni lo cheu! Selection paltlang tur a la thui lutuk! Kan sawi thin, indian sport huangchhunga induhsakna nasat thin zia hretu te kan nih kha maw! Indian hockey team buaina te, wrestling lam thlengin….Sawi zui chiam lo teh ang. Kan thailanna hmun nen a in tuha lo hial e! India camp a zawm hnu pawhin Dingdingi hian harsatna a la tawk cheu! Final selection neih a nih hmain a Kala lungte awm avangin Hi-Tech Hospital-ah enkawl a ni a. Hospital a chhuahsan atanga a ni hnihna lekah final selection an nei zui a! Practice na hun pawh nei loin a va hmachhawn ve tawp mai kha a nia. Mahse, Coach te leh VFI lam atanga selection Board member lamin an hrechiang a, vanneihna nasa takin a umzui kan ti thei ang chu. India aiawh tura thlan chhuah zingah a tel ve ta! Hetih hunlaia Coach, Miss Mahlimi te, MVA hruaitu Pu Rinpuia (President a nih lai) te, Pu Hruaia (Khaia Hero), Pu Zamliana Sailo, Pu Pachuaua (E-in-C, P&E) te Pu Zamlova, Miss Lalhmingmawii Pachuau(L)(Miss Mawitei) te khan theihtawp tak meuh meuhin an buaipuiin an ngaihven a. An chunga a lawmthu hi a sawi bang thei lo. Tichuan, kum 2010 khan Asian Youth Women Volleyball Championship @Kuala Lumpur, Malaysia ah India tan a khel ve ta. Hemi tum hian NE India atanga khel thei hmasa ber a nih thu an hrilh nghe nghe. Heng hunlaia an buaipui dan leh amah pawh a buai chhoh dan a ngaihtuah let hian, lunglenna, hlimna leh lawmna ten an la chenchilh reng thei a ni.
Mizoram tân : Sawi tawh ang khan mizoram tan hian vawi duai lo Dingdingi hi a feh chhuak tawh a. Hlawhtlinna engemawzat changin, final thlen phak loh tum pawh an ngah viau mai. Heng a hnuaia kan tarlan te hi Mizoram tana lawmman a dawn tawh thenkhat te an ni:
Kum 2005 khan East & Northeast Zone tournament, Assam a neihah Mizoram hmeichhe team kha 3na an ni a. 2006 ah National Women Sport Festival, Jammu ah 3rd an ni leh a. 2007 All India Rural Sport Meet Aizawl ah pakhatna an ni a. 2007 NE Sport Festival, Sikkim ah 1st an ni a. 2012 NE Games, Aizawl ah 1st an ni leh bawk a. 2014 & 2015 Niathu Sport Festival, Dimapur ah NECS hmingin an tel ve a, an Champion ve ve a. 2015 kumah hian Best Spiker lawmman a dawng nghe nghe a ni. Tichuan heng kan tarlan te bakah hmun dangah te Mizoram tan hian tum 20 chuang a fehchhuak tawh a ni.
A chawl dawn ta! : Hun a inher zela, mihring tuina avang leh Volleyball hmangaih vanga hun rei zawk khel thei dinhmuna la ding chungin, harsatna hian tumah a zuah bik si lova. Kum 2022 atang khan khup hliamin a bawh buai chho a, duhthusamin a dam hleithei ta si lova, chu bakah chhungkua te dina, pasal fanaute nen an nih ve tak diah avangin a game ngainat leh atchilh, a hmangaih rumrut mai chu a chawlhsan dawn ta der mai a. Pasal a neih hma leh a neih hnu thleng pawha a duh thala a inkhelh theih nâna hun remchang petu, a chhungte chunga a lawmna te, a pasal, R. Vanlalhriata(Hriattea) thlawpna tha tak avanga a hlimna zawng zawng te kha tunah chuan a nunhlui a chhuikir ruala a hnuk no kai chhuaktu a ni tawh anga. An fanu, Vanlalfini (Finfini)(4yrs) leh an fapa Zonuntluanga ten a sulhnu zuiin, a nu hming thatna khum turin Volleyball court chhungah nunchan an la rawn zir chho ngei anga, nu lunglenna chawk tho a, pa lawmna siamtu an la ni ngei ang! (“Renthlei nih ti nuamtu tur te” tih hi ka zep tel lo phal lo..he he) Tun atang erawh Dingdingi hian thangthar zawkte chetlâ chu mittui nena thlir chang a nei fo tawh ang. Naupang zawkte thlir rawn leh entawn, mizo hmeichhe zinga Volleyball thiam ber tia mi tam takin an sawi fo tawh tur, Vardingliani Varte chu a inkhel thlir tur awm tawh lovin, inkhel thlirtu lamah a tang dawn ta. A uiawma, a ngaihawm vawng vawng bawk ang. Mahse, mizoram Volleyball tana a sulhnu hnutchhiah zozai te hi theihnghilh a ni tawh lovanga, hriat reng a ni kumkhua tawh ang. Tunah chuan a chawl dawn ta! thangthar zawkte fuihtu tha tak ni zel turin duhsakna kan hlan e.
Hei erawh tarlan loh phal chi a ni lo. Dingdingi hian Volleyball a khelh chhung zawnga amah thlawp tlat tu, a chhung leh khat te, thenrual tha te mai bakah a pian a seilenna, Kanan veng mipui te thlawpna zawng zawngah lawmthu a sawi mawlh mawlh a. A hun bul atanga a chawlh ni a lo thlen thlenga a tana ding tlat, Kanan veng mipui ten an hmangaihna zozai te, an duhsakna leh support na zawng zawngah lawmthu a sawi mawlh mawlh a. Hun harsa leh khirh berah te, hun lawmawm leh hlimawmah pawh amah thlawp tlattu te hlutzia hi a sawi bang lova, theihnghilh ni a nei hauh lovang. “Kanan veng mipui te u, in fanu rangkachak hlutna hriaa, in thlawpna zozai te kha zoram mipui, volleyball chhungkua te hian an hmuh hmaih lova, an theihnghilh ngai lovang!”
DingDingi, “I thutlukna a zahawma, i sulhnu hnutchhiah zozai avang hian Volleyball lovers te thinlungah i châm reng anga, theihnghilh i ni tawh ngai lovang. I chhungkua, pasal fanau te tan nu chhuanawm ni reng la, I hmangaih Volleyball chu chawlhsan ta mah la, volleyball hi zofaten kan khelh chhung chuan i hming a dai tawh ngai lovang.”
By : Rohlupuia Renthlei