Germany-in Ukraine hnenah drone 50,000 leina tur pe

Germany chuan Ukraine hnenah attack drone 50,000 leina tur a pe nia sawi a ni a, hei hi Kyiv tana khawthlang sorkarin thil a lei tam ber pakhat nia hriat a ni.
Ukraine hi Russia nen kum li chuang indona an kalpui mekah mihring chuan lohna hmanrua, unmanned vehicle an tih ang chi hi a hmang nasa hle a, ​Ukrainian sipaite hian ni tin drone sang tel an thlawh chhuahtir thin avangin kum khatah maktaduai tel siam chhuah an ngai a ni.
Attack drone anlei tur zingah hian Ukrainian manufacturer SkyFall-in an siam, US defence technology ​firm Auterion-in a duan software hmang, a thlawh tawp dawna a tum a fuh thlenga chhui theih ang chi, Shrike first-person-view (FPV) drone pawh a tel.
Auterion CEO Lorenz Meier-a chuan contract lian tham tak a awm thu hi a nemnghet a, contract hi $ maktaduai 103 vel man a nih thu leh Europe ram pakhatin sum a pek thu a sawi a. Reuters hnenah drone thenkhat chu Ukrainian sorkar hnenah pek a nih tawh thu a sawi a, a bak chu kumin chhunga thawn tur a ni tih a sawi.
SkyFall pawhin Germany a inrawlhna tih hi a nemnghet a; mahse, company chuan he thil lei chungchang hi engmah a sawi thei lo tih a sawi a. German leh Ukrainian defence ministry te pawhin chuan engmah an sawi lo bawk.
Shrike hi drone man tlawm tak, kum 2023 atanga Ukraine-ah hman tan a ni a, tun hnai khan ram pawnah a langsar thar hle.
SkyFall-in UK company Skycutter nena an siam version Shrike 10-F tih chu tun hnai khan Pentagon-in a enkawl inelnaah a tha ber a ni a. Auterion chuan an software hi hmanraw hrang hrangah hman a nih thu an sawi.
Meier-a chuan Auterion hian kumin chhung hian Ukraine tan drone 1,00,000 peknaah hardware siamtu hrang hrangte nen thawhhona neiin a puih thu a sawi a, hemi atan hian khawthlang sorkarin eng emaw zat sum an pe a ni.
Khawthlang sorkarten sum an thawh zingah hian Pentagon-in drone 33,000 pekna tur contract $ maktaduai 50 pawh a tel a, hei hi Ukraine-ah a thawn tawh niin a sawi.
Thla hmasa khan Britain chuan kumin chhung hian Ukraine hnenah drone 1,50,000 a pe dawn tih a sawi a, hei hi $ tluklehdingawn 1.01 funding package lian zawka kalpui a nih tur thu a sawi.