Getafe laka bul tan tur Barcelona

Getafe laka bul tan tur Barcelona
Season thar atana La Liga fixture list tarchhuah takah Barca chuan kumin August ni 13 khian Spanish league title an kawl lai humhim tura an chetchhuah vawikhatna turah Getafe an luhkhung dawn a, he chawlhkarah tho hian Real Madrid-in Athletic Bilbao an tlawh ve thung ang.
Ningania Spanish Football Association (RFEF)-in fixture a tihchhuahah Catalan giants chuan season thara Clasico hmasaber an thleng dawn a, mahse, matchday 11-na Octo-ber ni 29-ah hian an khelmual Camp Nou thuamthat mek an la peih hman dawn loh avangin an hmelma lian ber Real Madrid hi Montjuic Olympic Stadium-ah an mikhual a ngai dawn a; team pahnih hian matchday 32-na kum thar April ni 21-ah league Clasico an khel leh dawn a, hei hi chu Santiago Bernabeu lamah a ni tawh ang.
Season thara La Liga chawlhkar hnuhnung ber hi a boruak a sang thei viau dawn niin a ngaih theih a, he chawlhkara an point dinhmun tur hi la hriat rih loh mah se Barcelona-in Europa League champion Sevilla an tlawh dawn a, Real Madrid pawhin Real Betis mikhualin, Champions League khel pha club Real Sociedad-in Diego Simeone-a team Atletico Madrid an mikhual ve bawk dawn a, point inthlau lo tak an nih hlawm chuan boruak tang ru tak a nih theih hmel dawn tlatin a lang!
Kumin krismas chawlhin December ni 20 atanga January ni 2 thleng a awh dawn avangin La Liga lamah chuan New Year’s Eve-ah football pet loin player-te’n lungthu tlawh-chhanin chhangban chhum an vil thei dawn!
Spanish football huang zauhna Saudi Arabia rama khelh leh tur Spanish Super Cup khelh hun atan nakkum January 10-14 dah a ni a, Arab ramah hian Barcelona, Real Madrid, Osasuna leh Atletico an tleh thla leh dawn a ni.
November ni 1 atangin Copa del Rey an khel tan dawn a, April ni 6 chu final khelh hun atan dahin, Seville khaw khelmual La Cartuja stadium-in a thleng ang.
2023-24 La Liga season hi kumin August ni 11, Zirtawpniah an tan ang a, kum 2024 May ni 26, Pathianniah an zo ang.