Glacial lakes (vurtlang dil) te chu an natural dam atanga insah thei reng niin mi maktaduai 15 vel chu dinhmun derthawngah siamin an awm tiin zirchianna thar ber chuan a tarlang.
-- Advertisement --
He zirchianna hi Newcastle University te zirchianna niin khawvel huapa tuilian awm thut theihna chhinchhiahna kalpuina hmasa ber a ni.
Climate a lum zel avangin glaciers tui zel hian dil a siam zel a. Global warming in glacial lake te a nghawng dan tur chiah hi hriatfiah theih a la ni lo va, mahse, khawvel pumah a nasa hle tura ngaih a ni.
He zirchianna hi journal Nature Communications-ah tihchhuah niin lui glacial lake dinhmun ni mek leh a chuanhnuaia mihring cheng zat te nena tarlan a ni a.
“Heng tuilian thleng theiin a khawih buai theih mihring tam tak an awm a ni,” tiin Racehl Carr, glaciologist, Newcastle University a thawk leh he paper author ni bawk chuan a sawi a.
“Eng hunah pawh tuilian thleng thei a ni a, chu tak chu a hlauhawmna pawh a ni a, a hun a thlen tur sawi lawk theih a ni tlat lo thung,” tiin a sawi.
Paper chuan dinhmun derthawng ber bera awm te chu Asia leh South America a tlangramah te a nih thu an sawi a. India, Pakistan, Peru leh China-a cheng zahve zette chu dinhmun derthawngah an awm a. Glacial lake atanga 10km huam chhung velah mi maktaduai khat vel an cheng a ni, an ti bawk.
“Glacial lake engtiangin nge an hnaih tih leh chhiatrupna thleng se insaseng hman turin ruahmanna tha a awm em tih chu a pawimawh” tia sawiin Dr Carr chuan, “Heng glacial lake te hi zirchian a ni fo tawh a, mahse, kan zirchianna hian a thlak danglam thung,” tiin a sawi a.
Glacier tuiin dil a siam te chu lung chi hrang hrang intawk khawm tena a khuah mai mai niin awlsam tea insah mai thei a ni bawk. Nasa taka tuilian chak tak a thleng a nih chuan heng dilte hi awlsam lutuka insah mai thei a ni, an ti bawk.
Heng dam te hi tun hma pawhin tlang atanga lung lian lumin a den avangin a insah fo va, chu chuan tuilian chak leh nasa tak thlengin tsunami ang maia nain a luang thin a ni.