Budget Session neih mekah lehkhapuan (paper) an hmang lo tan a, thil a inthlak nasa hle.
-- Advertisement --
India sorkar ding lai hian lehkhapuan hman loh (paperless) a tuipui a, thil hrang hrangah heti lam hi an bawhzui mek. Pawisa fai hmang lova online-a pawisa inpek chhawn te pawh hi chutiang chu a ni. Mizoram Assembly House pawh hi, India sorkar thua lehkhapuan hmang lo an ni.
Session-ah hian zawhna chi hnih, House-a inchhan chi leh ziaka inchhan chi (unstarred question) a awm thin a, Nilaini khan zawhna leh chhan hun hi hman tan niin, ziaka chhan chi hi lehkhapuanah chhuin (print) an inpe thin a, chutiang chu an ti ta lo.
House-a inchhan chi pawh hi ziakin an dah tho a, an inchhan lai pawhin zawh belhna tih loh chu a ziak an chhiar thin. Hetah pawh hian lehkhapuan hman loh hi an kalpui tan.
An kalpui dan chu, website-ah heng hi dah vek tur tih a ni a, ziaka sem lova website-a dah tur a ni. Website-ah hian an dah ngei a, chanchinbumite tan pawh a copy hi lak tur a awm tawh lo. Mahse House member-te daih tawk tur tlem azawng chu an la chhu (print) tho a, hei hi a tulna a awm vang a ni tih thu dawn a ni.
Zawhna hi Assembly Secretariat-in an dawng a, chu chu department-ah an sem darh leh thin. Tun tumah hian online hmanga inpek a ni ta a, department-te pawh website lama a chhanna lo dah tura beisei an ni. Mahse Mizoram Excise & Narcotics department leh finance department chauhvin hei hi an tihlawhtling a, department dang chuan CD emawin a chhanna hi Assembly Secretariat-ah an pe tih thu dawn a ni.