GN’R ‘November Rain’ billion stream
Guns N’ Roses hla hit ‘November Rain’ chuan Spotify-ah vawi tluklehdingawn stream a kai ta a, GN’R hla Spotify-a vawi tluklehdingawn stream kai thei palina a ni a.
GN’R hla dang Spotify-a vawi tluklehdingawn stream kai thei te chu an 1987 debut album ‘Appetite For Destruction’ album ami vek niin, an hla hit ‘Sweet Child O’ Mine’, ‘Welcome To The Jungle’ leh ‘Paradise City’ te an ni a, ‘Appatite For Destruction’ album hi US-ah maktaduai 30 chuang an hralh thei nghe nghe a ni.
‘November Rain’ hi 1991-a an album ‘Use Your Illusion I’ atanga an single pathumna niin, a vanglaiin Billboard Hot 100 (singles) chart No.3 a kai a, GNR hla he chart top 10 kai thei parukna leh a hnuhnung ber a ni zui ta a ni.
A music video-in boruak a nei lian hle a, a hunlaia music video siam nana sum sen hnemna ber a ni a, chutihlaia GNR frontman Axl Rose ngaihzawng supermodel Stephanie Seymour chu a video-a a changtunu ber niin, Los Angeles-a Orpheum Theater-a an live performance footage an dah tel bawk. A video-ah hian Axl leh Stephanie te innei lai leh Slash-a’n zungbun a ken theihnghilh lai te pawh langin, Stephanie thihna Axl-a’n a tawrh dan te pawh an tilang.
July 2018 khan November Rain music video hian YouTube-ah vawi tluklehdingawn en a hlawh thei a, YouTube awm hmaa music video an lo siam tawh zinga YouTube-a vawi tluklehdingawn en hlawh thei hmasa ber a ni nghe nghe a, February 2023 khan vawi tluklehdingawn 2 en a hlawh ta a, 1990s music video zinga YouTube-a en nasat ber a ni zui ta reng bawk a ni.
GN’R ‘November Rain’ billion stream
Get real time updates directly on you device, subscribe now.