Goal li khungtu Lukaku lansarh zan

Goal li tehreng thunin Ro-melu Lukaku chuan Pathianni zan Euro 2024 qualifying Group F match-ah singa faiin mikhual Azerbaijan lakah Belgium a chakpui a; ram tan game 113-a goal 83 thun tling chiahin top scorer a nihna a nemnghet a, amah hnaihbertu Eden Hazard lakah goal 50 zetin a chungnung tawh.
Kum 30 mi Belgian mihang striker palian hi men’s interna-tional football history-ah pawh goal khung hnem pasarihna a ni pha bawk.
Azerbaijan an mikhual zana a goal li thun hi first half chhung veka a hlenchhuah niin, minute 17-ah Manchester City FC mihang forward Jeremy Doku cross atangin a hmahruaina a tilut a; minute 24-a Eddy Israfilov hnawhchhuah a ni kha mikhual team-in a tuar ve pah bawk a tih theih ang.
Minute 37-ah Belgium captain Lukaku hian a goal lina a puitlin a; second half tawp dawn minute 90-na a kal mek laiin Leandro Trossard chuan Doki ke atanga ball chhuak hmangin mualneitu team goal ngana a thawh ve leh a, he inkhela goal nga lutte hi England-a inkhel player-te siamsak vek niin, Doku hian assist vawihnih neiin, Leicester City FC de-fender Wout Faes, Fulham FC defender Timothy Castagne leh Nottingham Forest FC midfiel-der Orel Mangala-te’n vawikhat theuh an siamchhuak ve bawk.
Tun kha international match pakhata Lukaku goal li thun tlin tumkhatna niin, a club career lamah chuan February 2017 daih tawh Premier League match-a Everton-in 6-3 ngawta Bourne-mouth an sawp tumin goal li a lo khung tawh bawk.
International football-a Lu-kaku aia goal khung hnem awmchhun parukte chu – Cristiano Ronaldo (128, Por-tugal), Ali Daei (109, Iran), Lionel Messi (106, Argentina), Sunil Chhetri (93, India), Mokhtar Dahari (89, Malaysia) leh Ferenc Puskas (84, Hungary)-te chuah an ni.
Euro qualifying kal lai lamah erawh top scorer niin, goal 14 a khawl tling tawh a, amah hnaihbertu Ronaldo (10) leh Kylian (9)-te aiin a sang.
Season kal laia a goal thun tawh zat hi European Champion-ship qualifying campaign kal mek leh liam tawh zawng zawnga record niin, kum 2008-a goal 13 thuntu Northern Ireland player David Healy a hmakhalh rualin kum 2016-a Poland forward Robert Lewandowski record a nihrualpui chiah a ni.
Red Devils (Belgium) hi Euro 2024 khel tura an group atanga tlang chiah tawh niin, Pathianni zana an point thum hmuh leh nen Group F table-ah Austria hma-khalhin hma an hruai a; kumin February thlaa boss atana Do-menico Tedesco an rawih hnuin tlawm an la nei lo tluang zel.
An group inkhel dangah beisei nei tawh lo Sweden chuan Stockholm khawpuiah sihnih faiin an mikhual Estonia an hneh ve bawk.