Gospel-i’n Feli Fanai hriatreng nana a buatsaih music video tichhuak

Gospel-i’n Feli Fanai hriatreng nana a buatsaih music video tichhuak
Gospel Zochhuanmawii chuan kum dangah pawh a lo tih tawh thin angin, a pianchampha, March ni 20-ah music video thar a tichhuak leh ta a, kumin chu khawhar hla ‘|henna Ram’ video siamin, a video hi hmanni lawka chatuan ram pan ta, Mizo hmeichhe zaithiam hriathlawh tak, Lalnunfeli, Feli Fanai ti a hriat lar pualin a hlan.
Gospel-i chuan, “March 20 hi ka piancham a ni a kumdanga ka lo tih tawh thin angin video ka lo tichhuak ve leh a, mahse, kumin chu ka tihchuah dan erawh a dang deuh. Ka thiannu Feli chatuan ram min pansan ta hriatreng nan ka video hi a pual liau liauin ka buatsaih ta a ni,”a ti.
Gospel-i chuan Feli Fanai nen hian tleirawl chhuah atanga inkawm tan tawh a nih thu sawiin,”Kan kalna linea inang lo a, gospel leh lengzem hla lama kal ni mah ila kan inkawm satliah lo, unau ang maiin kan khawsaa, riak dun leh chaw ei dun thin kan ti.
“Kan programme neihna a inan loh avang hian pawnlamah erawh kan inzui tam lutuk thei lo a, mahse, pawh then theih loh khawp hian kan inzawmna hi a thuk a ni. Thu chhia leh a tha engkim kan inhrilh tawh a, inbiain kan inzui chhuak reng thei lo mah ila, harsat leh mangan tak takah chuan engkim inhrilh hmasakah kan nei thin a, a harsatna te pawh a rawn thlen ve thin,” a ti.
A thiannuin hetianga a kalsan ta mai hi a tana a tih theih tam lo mah se a tih theih chhun amah hriatreng nan leh a pual liau liauin music video a buatsaih ta niin Gospel-i chuan a sawi bawk.
Mizo hmeichhe zaithiam, lengzem sa thin zinga hriathlawh berte zinga mi Feli Fanai hi nikum December atang khan natna hrang hrang avangin Aizawl Hospital-ah enkawl a ni a, ICU-ah awmin, chumi hnuah Ebenezer Hospital-ah sawn leh a ni a, February ni 12, 2024, zing dar 2:15 khan, kum 34 mi niin a boral a, hemi vek chawhnu lamah Champhai-ah vui a ni ta a ni.