Elvis Presley fa neih chhun, Juanuary ni 12 a thi, Lisa Marie Presley, kum 54, chu Graceland, Memphis-a a pa leh a fapa Benjamin Keough te thlan kiangah niminpiah khan an zalh ta. Lisa Marie Presley hi a fapa Benjamin thla bulah chiah ruang zalh a ni. Benjamin Keough hi July 2020 khan kum 27 mi niin a thi a, Elvis Presley hi August ni 16, 1977 khan kum 42 mi niin a thi tawh bawk a ni.
-- Advertisement --
Lisa Marie Presley hian a nu Priscilla Presley, kum 77, leh a fate Riley Keough, kum 33, (Danny Keough nena an fa) leh a faphir Harper leh Finley, kum 14 (Michael Lockwood nena an fate) a kalsan a ni.
Lisa puala hun hnuhnung an hmanah hian a milar thiante an tel tha hlea, nikuma tlangzarh Elvis Presley chanchin behchhana film an siam ‘Elvis’ film-a Elvis Presley lema chang Austin Butler pawh a tel a, Smashing Pumkins frontman Billy Corgan leh Guns N’ Roses singer Axl Rose te pawh an tel a, Axl hian Lisa thlah nan GNR hla hit ‘November Rain’ a perform nghe nghe a ni.
Lisa Marie Presley hian a pa hnung zuiin rimawi khawvelah pawh hniak a hnutchhiah nual a, 2003 khan a album hmasa ber ‘To Whom It May Concern’ a tlangzarh a, 2005-ah ‘Now What’ tlangzarhin, 2012-ah a album pathumna ‘Storm & Grace’ a tlangzarh leh bawk. Lisa Marie Presley hi King of Pop mual liam ta Michael Jackson nen pawh an lo innei ve zuai tawh bawk a ni.