Tunhnaia National Assessment and Accreditation Council (NAAC) endiknaa A+ grade hmutu Govt. J Thankima College hnenah Higher & Technical Education minister Dr R Lalthangliana chuan lawmpuina hun a buatsaih a. Lawmpuina thuziak a hlan chu he college principal Prof. JV Nunchunga’n a dawng.
Minister chuan Govt. J Thankima College (GJTC) in NAAC assessment ‘Grade C’ atanga ‘Grade A+’ an hmu chu hlawhtlinna ropui tak, awlsam taka chan mai theih a ni lo tih sawiin, grade hrang hrang pali zuankhum thei khawpa hma an sawn leh an tumruhna chu chhuanawm a tih thu a sawi.
NAAC hian GJTC hi vawi thum an endikna niin a vawi hnihnaah ‘Grade C’ (CGPA 1.67) a hmu a, theihtawp chhuaha tan la zuiin endik vawi thumna (third cycle) 2022 December 15 & 16 ah ‘Grade A+’ (CGPA 3.31) an hmu a ni.
Kum 1992-a din Lalhmingthanga College Durtlang leh 1993-a din J Thankima College Bawngkawn te chu Mizoram sawrkarin chhunfinin kum 2002 khan deficit-ah a hlangkai a, a hmingah Govt. J Thankima College tih a ni. Kum 2007 khan Mizoram University hnuaiah permanent affiliation an hmu a ni.
GJC hian hmun thumah campus neiin, Bawngkawna Central Campus-ah zirna in leh building pawimawh dangte a awm a, GJTC hmun hlui Bawngkawnah vek Southern Campus neiin Girl’s Hostel-ah an hmang a; Lalhmingthanga College hmun hlui Durtlanga Northern Campus chu Boy’s Hostel atan an hmang.
GJTC ah hian subject 8 zirtir a ni a, kuminah hian zirlai 1000 chuang awmin, Principal leh zirtirtu 40 leh thawktu dang 12 an awm mek a ni. Zirlai hi Mizoram chhung hmun hrang hrang bakah Manipur, Assam, Meghalaya leh Tripura atang an awm a, Myanmar leh Bangladesh atang pawhin zirlai an rawn kal a, zirlaite zingah tawng chi hrang hrang 21 hmang an awm mek a ni.
Grade A hmuh lawmpui
Get real time updates directly on you device, subscribe now.
Prev Post