Grammy Hall of Fame-a album 14 seng luh zingah 2Pac, Selena, Radiohead leh Janet Jackson album a tel
Grammy Hall of Fame-a album 14 seng luh zingah 2Pac, Selena, Radiohead leh Janet Jackson album a tel
Kumin atan Grammy Hall of Fame-ah recording 14 an la lut a, chung zinga album pahnih 2Pac ‘All Eyez on Me’ leh Janet Jackson ‘Rhythm Nation 1814’ te chu Billboard 200 (US albums) chart-ah pawh No.1 lo kai tawh an nih laiin, an lak luh album tam zawk chu Billboard chart-ah pawh lang pha miah te an ni hlawm.
Hall of Fame-a lak luh Radiohead “OK Computer” chuan Grammy award, best alternative music performance a lo dawng tawh a, Lucinda Williams “Car Weels on a Gravel Road” chuan Grammy Award-ah contemporary folk music album dawng tawhin, Janet Jackson ‘Rhythm Nation 1814’ chuan Grammy a dawng lo nain, a music video chuan best music video – longform a dawng a. Tuna hall of fame-a seng luh dang zawng chuan Grammy rim pawh an nam pha leh tlat lo.
Tun tuma an seng luh zinga record-na rei tawh ber chu Bertha ‘Chippie’ Hills “Trouble in Mind’ niin, 1926-a record tawh a ni a, chutihrualin 1990s a record pali lak luh zingah hian an tel a- Selena ‘Amor Prohibido, 2Pac ‘All Eyez on Me,’ Radiohead ‘OK Computer’ leh Williams ‘Car Wheels’ te an ni.
Tun tuma lak luh artist pathum chu kum 30 an tlin hmain mual an liam a. Selena leh 2Pac te chu kum 23 leh 25 an nihin kahhlum an ni a, Nick Drake chu overdose avangin kum 26 mi niin a thi ve thung. An zingah hian kum 100 dam thleng a tel a, Ella Jenkins a ni.
Grammy Hall of Fame hi Recording Academy national trustees-in 1973 atanga an tih tan niin, a tirah chuan 1959-a Grammy an sem tan hmaa hla leh album lo tihchhuah tawh te chawimawi nana an tih a ni a, mahse, tunah chuan hla leh album an tlangzarh atanga kum 25 tling tawh te chu he hall of fame-a lak luh tura chhawpchhuah theih a ni ta. Lak luh tur hi kumtin special member committee-in an thlang a, chu chu Recording Academy national board of trustees-in an thlifim leh thin. Tuna 14 an seng luh thar leh tak nen hian Grammy Hall of Fame-a recording seng luh hi 1,179 a tling ta a ni. Kumina lak luh hi album pakua leh hla panga a ni.
Grammy Hall of Fame-a lak luh thar te chu:
Alice Coltrane, Journey in Satchidananda
Nick Drake, Pink Moon
Eric B. & Rakim, “Paid in Full”
Funkadelic, Maggot Brain
Heart, Dreamboat Annie
Bertha “Chippie” Hill, “Trouble in Mind”
Janet Jackson, Rhythm Nation 1814
Ella Jenkins, “You’ll Sing a Song and I’ll Sing a Song”
Radiohead, OK Computer
The Rouse Brothers, “Orange Blossom Special”
Selena, Amor Prohibido
The Soul Stirrers, “Jesus Gave Me Water”
2Pac, All Eyez on Me
Lucinda Williams, Car Wheels on a Gravel Road