Grammy Nominations-ah Beyonce a langsar ber

Grammy Nominations-ah Beyonce a langsar ber
2025 Grammy nominees an puang ta a, Beyonce langsar berin nomination 11 a nei a, Charli XCX, Billie Eilish, Kendrick Lamar leh Post Malone ten nomination pasarih theuh neiin an dawt a, Sabrina Carpenter, Chappell Roan leh Taylor Swift ten nomination paruk theuh an nei bawk.
Nakkum February thlaa sem tur Grammy Awards hi a vawi 67-na tur a ni a, nomination hi an rama Zirtawpni khan an puang a, Beyonce hian nomination 11 a neih leh tak avangin Grammy nomination record siamin, tihian Grammy nomination-a a lan tawhna zawng zawng chu 99 a tling ta a, Grammy nomination a lang ngun ber niin, award 32 dawng tawhin, Grammy award dawng hnem ber a ni mek bawk.
Beyonce hian a album ‘Cowboy Carter’ avangin nomination hi a ngah hle a, album of the year bakah he album-a hla ‘Texas Hold ‘Em’ avangin record of the year leh song of the year a lang a, country category-ah nomination pali neiin, pop-ah pahnih, rap-ah pakhat leh Americana-ah pakhat a nei bawk.
Sabrina Carpenter leh Chappell Roan te pawh nomination-ah hian an langsar viau a, Grammy-a category ngaihhlut hlawh pali, Big Four an tih mai thin album of the year, record of the year, song of the year leh best new artist of the year-ah an lang vek a ni.