Grape wine zawrh

Nimin khan END Mamit duty-te chuan Mamit Bazar Veng-ah dan lova Grape Wine zuar MART dawr an dap a, Grape Juice chi hrang hrang an man, tiin sawrkar thuchhuahah a lang a. 
Grape wine leh juice an mante hi a siamtute chu - BCHA Grape Juice, Zunzam Banana Juice, Isabella Grape Juice leh Champ Wine, tia tarlan a ni.
Heng Grape Wine/Juice siamtute hi END website lamah eng tin nge tarlan an nih tih enfiah zui a ni a. END website-ah hian Isabella Grape Wine (Hnahlan Grape Farming & Processing Co-operative Society siam chhuah) te, Champwine, (Champhai Grape Growers Society siam chhuah) te leh, BCHA Winery (Address tarlan loh) te hmuh a ni a. Nimina dan lova zawrh an man chhuah zinga pakhat Zunzam Banana Juice tih hi, END website-ah hian a siam chhuaktu nihna leh dinhmun hmuh mai tur a awm ve lo niin a lang. 
END website-ah hian wine vendor list tarlan a nih dan chuan, Mizoramah license nei 53 an awm laiin mi 15 te chuan license an renew lova, mi 4 te chu an inhnukdawk leh a, tuna Mizorama grape wine/juice zuar mek valid license nei chu mi 34 an ni ta a; hei hi kum 2024-25 chhung atan a ni. 
Mamit district chhungah hian license nei mi pakhat a awm a, a license a renew loh avangin a valid tawh lo tihna a ni a, Mamit district chhungah chuan dan anga grape wine/juice zuar thei license nei pakhatmah an awm rih lo tihna a ni awm e. Chumi awmzia chu, Mamit district chhunga grape wine/juice zawrh reng reng chu dan kalh vek tihna a lo ni ta a ni. 
District danga wine vendor dinhmun chu - Aizawl-17; Lunglei-9; Champhai -2; Kolasib-2; Serchhip-4 a ni. 
Kuthnathawktute lamtang tia sawi hial Dan (The Mizoram Liquor (Prohibition) Amendment Act, 2025) kan nei thar a, kuthnathawktute thlai/thei tharchhuah, tunhmaa dehralna hriat loh avanga tawih ral mai mai ang kha awm tawh lo tura ngaih a ni a. Chutih laiin, a marketing lam a chak theihna tur hian, state pawn lam chu thuhran, keimahni state chhungah pawh hian awmze nei (systematic) deuh zawka a dehral/thehthang dan tur ruahman a pawimawh dawn hle niin a lang. 

Get real time updates directly on you device, subscribe now.

Leave A Reply

This website uses cookies to improve your experience. We'll assume you're ok with this, but you can opt-out if you wish. Accept Read More