Daily Newspaper

HMANGAIHNA LANTIR HI

85
                     Zoremi Hmar Zote

Hla phuahtu ten ‘fûr khaw thiang’ an tih, boruak lum lutuk tur vawng dài a, lo leh huan thlâi tana duahpui hluah hluah tham ni turin malsawm ruah tui a tam vânglai a ni a. Lunglêng mi tan phei chuan chhimbal zâm raih mai leh thing tin hnah thar sur mai te, ruah sûr thawm ri chiah chiah te hi lunglen hnuk kuai a, mittui sâwr chhuakah an tling tâwk em em mai!

Kâr hmasa lam khan hla phuahtu chungchang ningnel angreng tak kha ka rawn ziak nuaih a. Tunah pawh hla chungchang tho ka ziak dawn niin a lang hei. Tunlai chu kei akâr, hla min phuahtir nual mai a. A tam ber hi fam ngaih hla niin, lêngzem leh gospel lam pawh a tel tho a. Ka rawn sawi duh bika chu fam ngaih hlaah pawh, nupui pasal sûnna hla hi a ni.

Ni e, kan lo piang a, naupang chumchiap atangin ràwl lai nun kan hmang chho a. Siamtuin mihringa a bel tel te zinga ropui ber mai hmangaihna tem lo, tawng miah lo hi chu kuttang thliah tham lek kan awm àwm e. Nupui pasal kan han nei a, malsawm fanau nen Siamtuin min han thuam mawi zui a. Chhungkaw duhawm tak din leh, chhungkaw duhawm vak lo din te pawh kan awm hi maw!

“Nupui pasal, kawp lai then chu dàr leh lam sah thlâk ang/koki leh lam sahthlâk ang a ni,” an lo ti ma thlâwn lovin, ka la tawng ve lo nâ-in a nat dan tur hi ka hrethiam deuhin ka hria. Hla phuah ve thin ka nihnaah, kan ina lo kalin an chanchin an han sawi a, hnuk ulh teuhin, mittui nen ka lo ngaithla a, an rilru tur dàwnpui a, an dinhmuna indahin hla thu ka ziak ta thin a. Thihna, inthenna hi awm lo se ka ti ngawih ngawih mai thin, mahse vân kan thlen hma chuan, kan inthen reng ang a, kan piang zel bawk dawn chu a ni si a, thu kan nei lo taih taih em mai a, tih theih a vâng a ni e.

Kan kawppui, kan hmangaih kal tâ te tana kan tih theih tawk chu an thlân mâwi taka siam te, an pian champha a lo thlena an thlâna pangpar va dah leh, Krismas dawna chei vùl chúk kha a ni deuh mai a! Ka sawi fo thin a, “Kan hmangaih em emte kan chân a, kan sûn a nih chuan a aia na tur dang a awm lo. Chuvangin kan tah a chhuak a nih chuan tah mai tur. Kan hmangaihte kha an hlû a, an ngaihawm a, kan mittui hi an phû a ni; chuvangin kan tah a la chhuah theih hi chuan tah mai tur, Pathianin hun a tih hunah chuan kan mittui chu a hru hul ve mai a nia,” tiin.

Kei ngei pawhin ka fapa thla thum la tling lo deuh, a thih tûk maia tling tur ka sûn ve tawh a, a natzia hi tawn ve loh chuan sawi thiam a har a ni. Thla thum a tlin hman loh chiah avang khan zing dar hnih velah phùm a ni a, khua tal nghah vàrpui kha châkawm tak ni mah se, YMA dân hman lai a nih si avangin, a thim chhah ber laiin ka kut lova tlei thei lo ka naute kha phum a ni ta a ni a, kum kua lai liam tawh mah se nâ ka la ti!

Le, kan phun khawtlâi leh dawn! Sawi tawh ang aw. Nu emaw, pa emaw khan in hmangaih te pual hla kha, an dam lai khan han phuahtir teh u! A ni tawp mai a ni. Engmah an hriat tawh loh hnu, râuthla lêng takngial pawh a ngena ngen ngawih ngawih pawha rawn tir tha duh mang tawh lo an nih hnu-a tap tuaua an pual hla, mahni chauha ngaihthlak ai chuan, dam lai ngei mai khan, an la lawm theih lai, an la hlim theih lai khan an pualin hla han siam chhin teh u; an piancham pualin emaw, nute ni/pate ni denchhenin emaw han present hnáp mai ula maw, in nupa hlim dan tur kha ka hre thei deuh reuh a nia! Music video te pawh siam rawh u…in chhungkua khan han en ula maw, sawi tam a ngai lo, a tha dawn!

Fam ngaih hla bikah, nupui pasal sûnna hla ka phuah tam zawk ka tih tawh kha, chuvanga he thil hi ngaihtuah ka ni a, dam laia inngaihsak anga lan hreh tlat, an han thiha ngiau tuau reng mai bawk si nih te hi a ropuina a awm lem lo va, hmangaihna lantirna tur kan la neih lai leh, kan hmangaiha ten kan hmangaih a ni tih an la hriat theih lai te, lawm em ema an nuih theih lai te-a lantir mai hi a pà zawk a, a romantic ber mai a ni. Kum 2020 a ni tawh a, ‘Nu-i i bai chhuan a liam, va chawk tawh’ tih ang chi thing ultâ lutuk, hmânlai Mizo màwl lai nun changkang lo lutuk lai ang kha chu vawng lo ngam tawh ang u, a màwlthlâk em mai.

Chutih rualin, fam ngaih hla siam hi a tha lo ve ka ti a ni hauh lo a nia. Kan hmangaih em em, kan fate nu/kan fate pa ngei mai kan sûn a nih chuan inhnemna dang hi a awm lo tluk a ni a. An tan tih theih kan neih tawk a ni chauh tawh mai ve tho bawk a, a tha em em a ni. A nihna takah chuan an pual hla pawhin min hnêm zo lo achhá chu a ni e tirawh u…Thil awmzia hi a mak ve ngawt mai, hla te kan han siam a, a hla neitu hnemna tur si kha, an luài deuh pùr loh chuan hlawhtling kan inti meuh lo va, an tahpui nasat poh leh phuah tha niin kan inhria a, hnêmtu tur si khan velh tálh kan tum a! Mahse ni e, a hun lai a nih chuan tap se la, kan kianga an tap a nih pawhin anmahni aia ring mah paw’n kan lo tap ve mai ta lâwng! A pawi reng reng lo, a hun lai alawm.

Hei, hla chauh hi ka sawi dawn a ni lo a nia. Kan nitin khawsak phungah reng reng hian, nupa inhmangaih tawn, inzah tawn leh induat tawn te hi tlàwma lâk chi a ni miah lo, ka ti tak tak; ka uang miah lo! Dam chhung reilote-ah, vawi khat innei theuh theuh, inhâu fo mai nih bik te, pasalte tana inchei tlàwma la tlat nih te, nupuite ngâi hlêi hlûi thin hlé si, han biak vela bak hluk lawi si nih te hian eng thil changkang mah a paw chhuak lo. Kan tum chuan mi awh rûk nupa nun kan siam thei theuh; kan dam lai hian a ni, inhmangaih tur ni.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More

Privacy & Cookies Policy