Greece-ah neih inang te inneih remti tawh

Greece parliament chuan neih inang same-sex civil marriage bill chu pawm tain LGBT rights thlawptute tan chakna pawimawh niin Athens khawpuiah lawma pungkhawm an awm nual bawk.
Dan thar hmangin same-sex couple te chu inneih remtihna pein fa pawh an la thei dawn a, hei hi LGBT community tena hun rei tawh tak socially conservative ramah an lo ngiat tawh a ni.
Tihian Greece hi Orthodox Christian ram zinga neih inang te inneih remtihna pe hmasa ber a ni ta bawk.
“Hun chhinchhiahtlak a ni” tiin Stella Belia, same-sex parent group Rainbow Families hotu lu ber chuan a sawi a, “lawmna ni a ni” a ti bawk.
Bill chu seat 300 awmna parliament-ah lawmaker 176 ten thlawpin official government gazette a tihchhuah a nih hnuah dan a ni zui tawh dawn a ni.
Prime Minister Kyriakos Mitsotakis centre-right New Democracy party te chu leftist opposition ten an thlawp a, inhnialna nasa tak awm chungin cross-party unity awm chu thil thleng khat tak a ni bawk.
Tun hnaia opinion poll lakah Greeks te chu an ngaihdan a inang lo hle a. Thiltithei tak Orthodox Church, mawngkawhur suala ngaitute chuan an duh lo bur a, chutih laiin LGBT community te chuan bill chu an la duhkhawp tawk lo thung.
LGBT couple te chuan bill chuan assisted reproduction method a harsatna a chingfel lo an ti a, hei bakah hian surrogate pregnancy pawh LGBT te chuan an kalpui theih loh turin bill chuan a ruahman bawk.
Parliament-a far-right party pathum zinga pakhata tel Elliniki Lysi chuan bill chu ‘anti-Christian’ tia sawiin ram tana pawi a ni a ti bawk a. Prime Minister hlui Antonis Samaras pawhin sawiselin, “Neih inang inneih remtih hi human rights a ni lo” tiin a sawi.
Parliament pawna LGBT group pungkhawm te erawhin banner kengin, “Intluktlanna tak tak thleng rawh se” an ti ve thung a. “Greek khua leh tui kan nih ka chhuanga a chhan chu Greece chu tunah chuan khawvela progressive ber pawl ram kan nih vang a ni” tiin Ermina Papdima, Greek Transgender Support Association member chuan a sawi ve thung a.
“Kan rilru puthmang kan thlak dawn a. Kan nghah deuh pawh a ngai dawn a, mahse, dan thar hian min pui nasa dawn a ni,” tiin a sawi bawk.
Campaigners te chuan kum sawm tam dan siam that a nih theih nan an lo bei tawh a, Kohhran leh right wing politician te chuan an do bur ve thung. Kum 2008 khan lesbian leh gay couple te chuan dan bawhchhiain Tilos thliarkarah inneih runpui an nei a, mahse, a hnu lawkah chu inneihna chu Greece court sang berin dan kalh tiin a tihtawpsak a ni.
Mahse tun hnaiah hmasawnna awm zui zelin kum 2015 khan Greece chuan same-sex couple te chen dun leh inkawp civil partnership a rem ti a, kum 2017 khan gender identity-ah legal recognition a pe bawk a. Kum hnih kalta khan mihring sexual orientation tihdanglam tuma kum tling lote laka conversion therapy kalpui a khap bawk.