Greece tuipuiah raltlan 79-in nunna chan

Southern Greece tuipui kam hnaiha sangha manna lawng chesual avangin a tlem berah 79-in nunna chanin mi 100 chuang chhanchhuahin an awm a.
Dam chhuak leh Greek officials te chuan he lawng-ah hian migrants za tel tehmeuh an chuan thu an sawi a. Sorkar chuan Greece rama vanduaina rapthlak ber pawl tia sawiin ni thum chhung sunna neih turin a ti bawk a.
Lawng hi coastguard tena tanpui an tum an hnar hnuah Pylos chim thlanglam 80 km velah a pil ta tiin an sawi. Lawng hi international water ah Thawhlehni khan EU border Frontex aicraft ten an hmu tawh a, lawnga chuangte hian life jacket pawh an ha lo tia sawi a ni.
Greek public broadcaster ERT te chuan thuneitute chuan lawng hi satellite phone hmangin tum tam tak an biak pawh thu sawiin tanpui an tumnaah pawh, “Engmah duh kan nei lo Italy a kal duh mai kan ni,” tiin an chhang tia sawi a ni.
A hnu lawkah erawh lawnga chuang pakhat chuan Greek coastguard te hnenah lawng engine chu a chiang lo tiin a hrilh a. A hnu lawkah lawng chu minute sawm atanga sawm panga chhung vel lekin a pil zui ta mai a. Chhanchhuah tuma beihna pawh thli na tak a tleh avangin a tikhaihlak nasa hle bawk.
Tuipuia migrants te tana emergency helpline Alarm Phone te chuan coastguard ten tanpuina pek an inhuam thu an sawi hma daihin lawngin harsatna a tawk mek tih an hre tawh tiin an sawi thung.
Mahse lawnga chuangte chuan Greek thuneitute chu migrant te thawnlet leh an hrat em avangin an pawh ngam lo va an hlau tiin an sawi bawk a. He lawng hi Libya atanga Italy pan niin lawnga chuang tam ber te hi kum 20 chho bawr vel vek nia ngaih an ni a.
Ni eng emaw zah lawnga zin tawhin Thawhlehni khan Maltese cargo ship te chuan tui leh eitur an pe tiin an sawi bawk.
Lawnga chuang dam chhuakte chuan lawng chhungah mi 500 atanga 700 vel an chuang tiin an sawi a. “Lawngin a phurh theih bak aia tam daih lawngah hian an chuang a ni,” tiin regional health director Yianni Karvelis chuan a sawi.
Coastguard Cpt Nikolaos Alexiou chuan chhanchhuah theih ang ang an chhanchhuah thu sawiin lawng chu Mediterranean-ah pawh a thuk ber laiah a pil tiin a sawi a. Nunna chan te eng ram mi nge an nih tih pawh hriat theih a ni rih lo bawk.
Dam chhuakte hi Kalamata khuaah lak niin damdawi Inah enkawl zui nghal an ni a. ERT te chuan traffickers nia rinhlelh pathumte chu thu zawhfiah tura lakhran an nih thu a sawi.
Greek President Katerina Sakellaropoulou chuan a hmunah kal chilh nghalin chhanchhuah hna a enfiahpui nghal bawk a ni.
Kum tinin Mediterranean paltlang tum mi za telin nunna an chan ziah a. Kumin February thla pawh khan migrant te phurtu lawng chu southern Italy a Cutro ah pil tawhin mi 94 velin nunna an chan phah tawh bawk.
Greek migration ministry official Yiorgos Michaelidis chuan Greece chuan EU hnenah tum tam migration policy khal veh vawh a neih a ngaih thu a hrilh fo tawh a ti a. |anpui ngai tak tak raltlante pawma smuggler te hnawl dan tur ruahmanna tha neih a ngai a ni tiin a sawi a. “Tun dinhmunah chuan smugglers te zawk chu Europe a lut nasa ber ber an ni tlat,” tiin a sawi.
Greece hi Middle East, Asia leh Africa atanga dan lo anga European Union lut turte tana kawng bera an hman a ni a. Kumin hian Europe-ah migrants 70,000 chuang an lut tawha ngaih niin a tam ber chu Italy-ah an lut niin UN data chuan a tarlang.