June 11-a hman thin Green Mizoram Day chu kuminah Pathiannia a tlak avangin Zirtawpni khan state pumah hman a ni a. Thing phun a nih bakah thing phun sa enkawl zuiin hnatlang te neih a ni. Kumin thupui chu “Thing phun ila, enkawl zui ang u” tih a ni. Larsap Dr Hari Babu Kambhampati leh a nupui Dr Jayashree Kambhampati te chuan Raj Bhavan Circular Lawn sirah Theihai tiak an phun a. Green Mizoram Day puala thingphuntute chungah larsap chuan lawmthu a sawi. midangten Mizoram min hmuh dan chu thing leh mau awm tamna, hmun hring leh ecosystem tha tak awmna a ni, tiin, khawvel pum huapa kan chhehvel boruak chhe mek zel chu vei a hlawh tawh a. Thing leh mau chereu nasa lutuk avanga khawvel sik leh sa danglam mek leh boruak lum chho ta zelah a siamthat hna nasa taka thawh a ngai tih a sawi. Kan chenna khawvel tuamtu boruak siamthat hna hi thingphun a ni emaw vawikhat hman sarang hman loh chungchangah leh thildangah kan theihna zawna lo zawm a, tha thawh ve zel chu kan mawhphurhna a ni tih sawiin, “Kumtin, kum khatah thing tiak pakhat tal emaw a aia tam phun ziah turin mitin ka ngen a ni,” a ti.
Environment, Forest & Climate Change department buatsaiha Sihphira hun hman hmanpuitu chief minister Zoramthanga chuan thing phunah chauh duhtawk loin enkawl zui zel a tul tih a sawi a. Tih dan pawh hun leh mamawhna milin thlak hret hret a, environment thatna tur bakah economy tihhmasawnna tur ngaihven kawp a pawimawh tih a sawi. Ram thang zelah kan thing phunte enkawl zui a awlsam phahna atan khawpui chhung leh mihring chenna hnaiha phun leh ramhnuaia phun tur thlan uluk a tul tih a sawi a ni.
“Economy hmasawnna leh environment humhalhna hi thil tam taka inhal anga ngaih theihna awm mah se, a kalkawp dan zawn zel a pawimawh a. Green Mizoram Day puala kumin thing phun hi tha taka enkawl zuia humhalh a nih zel a, Mizoram hring zawk, par mawi zawk leh nuam zawk kan neih theihna tura rahbi pawimawh tak a nih ngei ka beisei,” Zoramthanga hian a ti.
EF&CC minister TJ Lalnuntluanga chuan Green Mizoram Day hman hian hmuh theih rah tha a chhuah ngei theihna’n thing phunte hi a enkawl zuinaah mipui kan zavaia mawhphurhna lak tlan a pawimawh tih a sawi a. Tunhnai lawkah central nursery cheithat niin tunah thing tiak nuai 2 vel lak tur a awm tih a sawi. Nursery dangte pawh thuamthata cheithat mek a ni tih a sawi bawk.
Green Mizoram Day denchhena kangmei ven kawnga district leh khua titha bakah intihsiakna lawmman sem nghal a ni a. District level-a kangmei veng tha ber chu Lunglei niin, 2-na Champhai, 3-na Kolasib a ni. Villege level-ah kangmei veng tha ber khua chu Kepran a ni a, 2-na Samlukhai, 3-na North Lungleng a ni. Ramkang laka invenna lam inhrilhhriatna video clip siamah 1-na KTP Bethlehem North Branch, 2-na PYD (NEI) Aizawl East District Khawhai, 3-na KTP Vaivakawn Branch an ni.
Sakawrhmuituai Tlangah chief minister leh EF&CC minister ho hian thingp hun a ni a. Ram zia mil tura thing thlan – Tlaizawng, Vaube, Kuangthli leh Ngiau phun a ni.
Green Mizoram Day hmang Larsap leh CM-in thing phun
Get real time updates directly on you device, subscribe now.