Aizawl leh a chhehvel ram hring tha tak ni thin lo ro tan kha, a hma anga ti-hring leh turin tanlak a ngai tiin sawrkar chuan hma la tur Green Aizawl Committee chu 1998 khan a din a. A bul tan nan Aizawl leh a chhehvelah thingtiak 94,063 phun a ni a. Mipuiin thingphun pawimawhzia an hriat theih nan inzirtirna signboard hmun 100-ah tar a ni bawk.
Aizawl chauh huap lovin Mizoram huapin hma lak ni se tiin a kum leh 1999 atangin Green Mizoram tih hming puttir a ni a. Kum 25 zet a liam ta, nikum 2023 thleng khan kum tina thingphun zat hi chawhrualin nuai hnih vel anga ngaih theih a ni a; thingtiak nuai 50 chuang phun a ni tawh tihna a ni. Mahse, vanduaithlak tak maiin, thingtiak phun kan uar tehlul nen, thingphunte a nung zui em tih ngaihsak lova kum 14 zet a liam hnuah 2013 atang khan thingphun nung zat chhinchhiah tan a ni chauh a. Thingphun nung zat hi za zela 62 te, 58 te niin, 2015 atang khan 70% a kai ve ta a. Thingphunte enkawl zui loha a awm chhung kha a rei thawkhat avangin, tun dinhmunah hian, thingtiak phun zawng zawng nuai 50 atanga nuai 30 vel chu nung tha tura ngaih theih a ni chauh awm e.
Heti zawng hian ngaihtuah ta ila. Kum 25 liam ta chhunga kum tina thingtiak phun nana sum leh pai, tha leh zung leh hun kan senso nasat em em laiin, a lehlamah chuan, kan thingtiak phun let za tam tak thing leh mau kan vatthluin kan hal kang dur dur reng a. Mizoram tih ‘Green’ kan tum laiin, a lehlamah nasa takin kan ti ‘Dry’ leh lawi a. Thing pakhat tihnun kan tum laiin thing nungsa za kan ti thi zel ang a ni awm e. Thingtiak phun lo phei ila chuan, kan ro chak lehzual dawn tihna lek a ni.
Green Day kan hman apiangin thingtlang loneih tlakhniamna hi pung ve zel turin tan kan lak a tul ta hle. Kum tina thingtlang loneih tlakhniamna hi 5% tal pawh ni se, kum 10/20 chhung chuan thingtiak kan phun let sang tam tak thing puitlingsa kan hum dawn tihna a ni.
Environment hi kan vei tak tak a nih chuan, kum tina ramngaw thiat zawnga eizawnna thingtlang loneih bansan zawnga eizawnna dang kan zuan a ngai. Chu chu mipui tan chemtum nen ringawta sual chhuah mai theih a ni lo a, sawrkar thachakna a ngai. Sawrkarin bul a tansak ang a, loneituten an chhunzawm ang; chu chu sawrkar awm chhan a ni.
Green Mizoram leh thing\iak
Get real time updates directly on you device, subscribe now.
Prev Post
Next Post