Group YMA-in Tuivai lei dawh en

Tipaimukh road, Mizoram leh Manipur inkalpawhna Tuivai lei dawh mek chu Nilaini khan Chalfilh Group YMA chuan a hmunah an enfiah.
Tuivai lei hi kum 1998-a tuilianin a lak hnu ah tun thlengin dawh tlang lohin a la awm a. Mizoram sawrkar hmalakna in lei hi dawhkai tura thawh mek a ni. Chalfilh Group YMA Rorel Inkhawm thurel bawhzuiin lei dawh mek hi tlawhin, lei dawh hna thawh a nih dan leh hmabak la awm te an en a. Hmuh theih chinah hnathawh a tha thawkhatah an ngai.
Lei hi Mizoram PWD chuan kumin March atang khan departmental work-in a thawk a, lei dawhkaina tur hmanrua thenkhat hi kawng chhiat vangin a la thleng kim thei loa, a bak hmanraw dang pawimawh chu a thleng kim vek tawh. Lei dawhkai hna hi ECCENSS Fabrication Pvt. Ltd thawh tur a ni dawn a, hna an tan theih hunah rokhawlhna dang a awm loh chuan thla khat leh a chanve velah dawh zo hman tura ngaih an ni.
He lei dawhna banpui ber, abutment hi a hlui hman nawn niin, thawmthat a nih bakah tih chak belh a ni a, vaukam lama a lei innghahna – pier erawh siam thar a ni.
Tuivai lei hi National Highway 154 kaltlang niin, New Vervek leh Sihpuikawn Manipur inkara awm a ni a, he lei hi siam zawh a nih chuan awlsam zawkin Mizoram leh Manipur chu inkalpawh zung zung thei tawh tura ngaih a ni.