GST rate tih hniam tur ho tih hniam loh chuan sawrkar thikthu chhe dawn

GST rate tih hniam tur ho tih hniam
loh chuan sawrkar thikthu chhe dawn
GST hniamna tur bungrua leh tha zawrhna lama sumdawngten a zawrhna man ti hniam lo an awm chuan sawrkar thikthu a chhe hle dawn a, action lak zel a ni dawn tih Taxation hotute chuan an sawi.
Commissionerate of State Tax chuan September 22 atanga hman tur, India ram puma Goods & Services Tax rate tihdanglam leh a kaihhnawiha hriat tur inhriattirin Mizoram puma Taxation officer-te tan intuaitharna hun an buatsaih a. Workshop hi Hybrid mode-a kalpui niin, Aizawla awm tax official-te chu a hmunah kalin district dang zawngin online mode-in an zawm thung.
Commissioner of State Tax HK Lalhawngliana sawi danin, GST Council chuan kumin September 3 khan bungrua leh tha (service) hrang hranga hralhnaa GST rate thar hmanna tur a rel a. Rate thar hmanga India ramin tax reform a kalpui tur hi September 22 atanga hman tur niin, GST rate hlawm li awm thin chu hlawm lian hnih (two slabs) ah kalpui a ni tawh anga, bungrua leh tha hralhnaa GST rate chu 5% leh 18% a ni tlangpui tawh ang. Vaihlo leh a kaihhnawih thilah 28% GST lak a ni anga, lirthei thenkhatah 40% a ni ang.
GST rate tihdanglam tur hi a tlangpuiin, a hniam zawnga a kal dawn avangin thil man hniam phah tur tam tak a awm dawn tih commissioner hian sawiin, “Sawrkarin GST rate tihhniam hian a tum lian tak chu, mipui nawlpui ban phak leh man tlawm zawka lei theih tura thil man siamthat a ni. GST hniamna tur bungrua leh tha zawrh lama sumdawngten a zawrhna man an tihniam ngei tur a ni a, hemi kawngah hian sawrkar chu a thikthu a chhe hle dawn. September 22 hnulamah chuan GST rate tih hniamna bungrua leh tha zuar zingah a man tihniam lo report lut a awm chuan, anti profiteering measure hmanga action lak zel a ni ang,” a ti.
GST reform atan hian Taxation officer-te pawh chak lehzuala hna thawh a tul dawn, tiin, sumdawngte pawhin an tih ngei ngei tur – anmahni dawrtute hnenah tax invoice an pechhuak tur a ni tih a sawi bawk.