Guarantor-a sawrkar a tan phal loh dan siamthat rawtna pawm

Guarantor-a sawrkar a tan phal lohna dan awmsa chu titawp a, dan siamthat rawtna chu Council of Ministers chuan a pawm.Ningani khan chief minister Lalduhoma kaihhruaiin Council of Ministers hi an thukhawm a. Agenda 20 zingah 17 pawmin, Finance department atanga lut, guarantor-a sawrkar a tan phal lohna dan titawp a, dan siamthat rawtna – Proposal for Amendment of the Mizoram Ceiling on Government Guarantees Act 2011 and the Mizoram Ceiling on Government Guarantees Rules 2013 by introducing the Mizoram Ceiling on Government Guarantees (Amendment) Bill 2024 chu pawm a ni.
DP&AR atanga lut, aikal lak chungchanga dan kenkawh theihna tur rawtna chu pawm a ni a. Centrally sponsored scheme hnuaia thawk leh state sawrkar hnuaia contract employee kum 15 thawk tling tawh leh provisional employee/ muster roll employee kum 20 thawk tling tawhte dahnghehna tura rawtna chu bawhzui tura pawm a ni.
Finance department-in police rifle allowance Rs. 40 atanga Rs.80 a tihpun a rawt chu council of minister hian Rs.100 a tihpun a rel thlu thung a ni.
India leh Myanmar inrina ramri hung leh ramri hrula inkalpawh tawn theihna – Free Movement Regime thiah tumna awm chu a taka hman loh an duh thu pawh council of minister thutkhawmah hian sawi a ni a. Remal Cyclone vanga chhiatna chhawmdawlna hnathawh dan DM&R department-in sawifiahin, a tul anga hma lo la chhunzawm zel tura tih an ni.