Halpuah

Krismas leh Kumthar vuakveta halpuah etc. hal khap a nih thu hriattirna chu thlakhat vel kalta atang khan tihchhuah a ni a. Heti chung hian, zan lamah halpuah hal ri a khat mawi tawkin tunlai hian hriat tur a awm deuh reng tho. Hetianga a rik pheuh pheuh theih reng chuan khapna danin kenkawh a hlawh tha vak lova ngaiin midangte pawhin halpuah hal pawitihlohna an nei zel mai ang tih a hlauhawm hle a ni.
Mizoram Pollution Control Board lamin halpuah that loh dan hrang hrang thahnemngai takin an auchhuahpui thin a; halpuah leh a behbawmte hal lo turin mipui an ngen a. Halpuah halin boruak a tihchhiat theihzia te, mihring hriselna lamah nghawng tha lo tak tak – Chuap, Mit leh Beng a khawih pawi theih dante pawh an tarlang a. India Dânpui, Article 21-nain mi tinte hrisêlna a humhalh tlat angin tumahin mi dangte hrisêlna khawih pawi zâwnga an khawsak a remti lo a, a bîkin kum upa lam dawrâwm zâwk leh naupangte hrisêlna khawih pawi thei zâwnga chêt phei chu a rem lo lehzual, MPCB chuan an ti a ni.
Thilsiamna khawl khu leh lirthei khu avanga boruak bawlhhlawhin mihring hriselna a tihchhiat nasat mek laia boruak bawlhhlawh hlauhawm zawk tichhuak thei halpuah hal phet kan la tum hi chu, kan changkan lohzia lanna a ni ber a. Halpuah hal hi han ngaihtuah chian chuan thil ho tak a ni. A ri dur a, boruakah tûr hlauhawm tak tak a darh suau a, chu chu mihringin kan lo chhiatpui a; chutiang atan chuan kan insengso tawk tawk a, thil atthlak tak a ni. A hnu lamah tangkai zuina a nei lo a, sawi zui lah a hlawh ngai hek lo. A lo berah, ‘khami zan halpuah hal ri kha…’ tih vel mai mai a ni. Sum tam tak seng chung leh, hun leh tha seng chunga kan buaipui em em thin kha a tangkai lohzia leh a hohzia han chhut ila, halpuah hal te hi a zahthlak lama ngaih chi a ni.
Chutih rualin, sawrkar phal loh, khap tlat thil a ni a, khap a nih chuan khapna dan chu a nihna ang taka kenkawh mai tur niawm tak a ni.