Hamas commader thahin muanna tiderthawng thei

Hamas commader thahin
muanna tiderthawng thei
Hamas palai hotu ber, Khalil Al-Hayya-a chuan Israel-in Inrinnia an pawla commander lawk zinga mi an that chuan ‘muanna a awm nana thil kalpui zel tur’ a tikhawlhkham thei niin a sawi.
Pathianni TV-a thu a sawinaah Gaza Hamas chief tlanchhe mek ni bawk, Hayya hian Inrinni khan Israeli-ten an pawl commander hlun ber pakhat, Raed Saed chu an that tih a sawi a ni.
Saed-a hi US-in a rawtna zawma October thla atanga Gaza-a Israel leh Hamas inkahhai puan a nih hnua Hamas hotu an thah lawk ber a ni.
“Israeli-ten inkahhai thuthlung an palzutna a thleng zel a, tun tumah Saed-a an that leh a, hei hian inremna awm zel tur a tiderthawng thei dawn a ni,” tiin a sawi.
“Palai hna thawktu, a bik takin ruahmanna siamtu, US sorkar leh President Donald Trump-a hi Israel-in inkahhai zaha an intiamna anga awm tura nawr turin kan duh a ni,” a ti.
Hamas-in an sawi dan chuan Saed-a hi an pawl sipai pawla second-in-command niin Izz eldeen Al-Hadad-a dawt chiah a ni a. Israel chuan October 7, 2023-a an pawlin an ram beia indona chhuah phahna ni taa a mawhphurtu leh ruahmanna siamtu zinga mi a nih thu a sawi.
Hayya-a hian UN-in a rawt leh thuneihna a neihna tur, International Stabilization Force (ISF) chungchang pawh TV-ah hian a sawi chhuak.
“Ram dang sipai lo awm turte hi inkahhai vawng tur leh Gaza ramrite vengtu tur chauha lo awm tur a ni a, a chhungah leh inrelbawlna thilah an inrawlh ve tur a ni lo,” a ti.
Trump-a’n Gaza-a muanna a awm theih nana rawtna a neih anga inkahhai kalpui mekah ram dang mi sipai dah hi kal dan tur hmabak a ni mek a. Inkahhai thawh khatna kalpui mek hi October 10 atanga tan niin kum hnih indona a tawp phah rih a, Hamas-in Israeli an hrente chhuahin Israel pawhin Palestinian a mante a chhuah ve bawk.
US Central Command chuan Thawhlehni hian Doha-ah an thawhpui ramte nen Gaza-a ISF dah dan tur sawiin an thukhawm dawn a ni.