President Murmu-i’n Manipur tlawh

President Droupadi Murmu-i chuan Manipur mipuite chu an in tia an sawi ‘ram mawi tak’ chu mi inang lo tak tak an awm chu a nih thu a hrilh a. Tlangram leh phaizawl tia Manipur inthen chu tha a ni dawn lo va, tlangram leh phaizawl chu intikimtu ve ve a nih zawk thu a sawi.
Manipur hi February atang khan President’s Rule-in an la awm mek.
President Murmu-i hian Ningani khan state khawpui, Imphal thlengin May, 2023-a phaizawla cheng, Meitei leh tlangram leh ramngaw tamnaa cheng, Kuki inkara buaina a chhuah hnua a tlawh hmasak ber a ni.
“Manipur chakna nunphung, tawng leh tih dan inang tak tak awmna a nihna hi a ni a. Tlangram leh phaizawl hi a intikim tawh a. Ram pakhat mawi tak lehlam lehlam ang a ni a, muanna, inhriat thiam tawnna leh induhsak tawnna a awm theih nana hmalakna hi tha ka ti a ni,” tiin President Murmu-i hian Zirtawpnia Imphal atanga km 60-a hla, Senapati district a tlawhnaah a sawi.
“Indian sorkar hian state mipuite tlakchham a hria a. Muanna leh than in duhna rilru hi ka hre thiam a. Indian sorkar hian Manipur mipuite than zela khawsak nuam an nih theih nan hma a la reng tih ka sawn nawn leh duh a ni,” a ti.
Senapati district-a Maram Naga mite leh buaina avanga baihvaia awm, internally displaced person (IDP) te a tlawh hma hian president hian Imphal-a Shree Shree Govindajee Temple-ah a tawngtai bawk.
Governor AK Bhalla pawhin social media-ah President Murmu-in Maharaja Nara Singh-a hun laia kum 1846-a sak temple a tlawh lai hi a dah chhuak.
Kum 1904 leh 1939-a British laka helnaa beitu hmeichhiate hriatrengna lungphun, Nupi Lan (Women’s War) memorial a tlawh bawk.
Senapati district-ah hian President Murmu-i chuan he district hian Manipur-a nun dan inang lo tak tak lan chhuahna hmun a nih thu a sawi a, tribal tam tak an cheng ve tih a sawi.
Maram Naga hnam chu Particularly Vulnerable Tribal Group (PVTG) tia chhinchhiah an nih thu leh an state-a PVTG awm chhun an awm thu a hrilh.
“Maram nunphung danglam tak hian India-a tribal-te nun dan danglam bik a pho chhuak,” a ti.
Tun hnaia Manipur-a tlangram district-te chuan hamthatna tam tak dawngin kawngpui leh lei siamsak an ni a, national highway, tlingtlang kawngpui leh damdawi in, zirna, tui in tur leh electricity supply thlenga tihhmasawn an nih thu a sawi.
President Murmu-i hian ni hnih chhung Manipur a tlawhnaah hian khawvela polo ground hman lai upa tawh ber nia sawi, Imphal-a Mapal Kangjeibung-ah sagol kangjei (polo) khel a en bawk.
Manipur-a Meitei-Kuki hnam intihbuaina hi ram neitu nihna, politic-a aiawh insiam chungchang leh thil hrang hrang a ni a, May, 2023-a an buai atangin mi 260 chuang thi an awm tawh a, mi 50,000 dawn baihvaiin an la awm mek.
Tharum thawhna zualpui tawp tawh mah se Kuki-te hian phaizawla let leh hi an duh lo va, buaina chhuah laia an thil tawn kha an hre reng tih an sawi a. Hetiang avang hian Meitei tlanchhiate pawh Kuki awmna district-a an in leh an khuaah an haw an phalsak lo bawk.
Ningani khan National Human Rights Commission (NHRC) chuan police leh Kangpokpi district-a thuneitute chu Imphal leh an thenawma Nagaland-a Dimapur inkalpawhna ber, National Highway-2 danchah hawn a nih theih nana che chhuak turin an ti nghe nghe.
President Murmu-in an state a tlawh hi Myanmar ram hnuaia biru mek Meitel hel pawla mite chuan an boycott a, helho hi kum tam tak chhung hel tawh an ni a, Indian hruaituin a tlawh hian an lo boycott fo tawh thin.