Hamas-in a mi hrente a chhuah chhunzawm dawn

Hamas-in a mi hrente a chhuah chhunzawm dawn
Hamas chuan Gaza inkahhai inremna an siam angin an mi hrente an chhuah zui zel dawn tih an puang a, hei hian indo chhunzawm leh hlauhna awm mek chu a tinep leh beisei a ni.
Cairo-a an inbiak hnuah Palestinian hel pawl hian Egypt leh Qatar atanga palai hna thawktute chuan harsatna awmte ‘lak kian a ni dawn’ tih an tiam tih an sawi.
Israel atangin chhanna hriat tur a la awm lo va; mahse, Egyptian leh Qatari palaite chuan lehlam lehlama mite hian an inkara inrem lohna awmte dah thain inremna an lo neih tawh anga kal tlang an tum ve ve tih an sawi thung.
Thawhlehni khan Israel chuan Hamas hian Inrinnia mi hren an chhuah zui lo a nih chuan inkahhai a tawp dawn tih a sawi a. A hmain Hamas hian Israeli-ten inkahhai an bawhchhia nia sawin mi hren chhuah hun tur sawn an tum thu an sawi.
Hamas-in Israeli-ten inremna an zawm loh zingah mihring puihna tur pawimawh, puan in leh awmna tur pek luh tur an pe lut lo niin an sawi a, Israel-in a pha thung.
Israeli Prime Minister Benjamin Netanyahu chuan, “Hamas hian Inrinni chhuna an mi hren an lo kirtir lo a nih chuan inkahhai hi a tawp nghal ang a, Israeli sipaiten Hamas chhu chimit turin a tawp nan an che ang,” a ti.
Nilaini khan Egypt chuan Qatar nen inrem lohna awm chin fel tumin hma an la tih an sawi a, Gaza-a Hamas hruaitu, Khalil al-Hayya pawhin Cairo thlengin Egypt-a intelligence chief leh mi pawimawh dangte nen an inhmu dawn tih a sawi.
Ningani khan Hamas chuan thuchhuah siamin inremna an ziaha telte chu tihpuitlin vek a ngaih thu tar langin heng zingah hian Gaza-a caravan, puan in, in sakna hmanraw lian, damdawi leh tuialhthei phurh luh pawh a tel tih an sawi.
Inbiakna pawh ‘hlawk tak’ neih niin palaiten ‘an kara harsatna awmte chin fel an tum’ tih an tar lang tel.
“Hetiang a nih avang hian Hamas chuan inremna kan ziah anga kal kan tum a, mi tang pawh a hun ruatah inthleng zel tum a ni,” an ti.
Hetih mek lai hian Egyptian sorkar enkawl, Al Qahera TV chuan Egypt leh Qatar chuan ‘harsatna an ching fel’ tih a sawi a, Israel leh Hamas chuan inkahhai inremna kalpui zel an tum tih a puang bawk.
Qatar-a Al Jazeera TV pawhin indawrna a hlawhtling a, Ningani khan mobile home leh hmanraw liante Gaza-a luhtir turin an ti tih a puang ve bawk.
Hetih lai hian Israeli chanchinbute chuan Israeli prime minister pisain Al Jazeera thupuan chu ‘a lem’ a nih thu leh ‘innghahna nei lo’ a ti niin an tar lang.
Israeli sorkar thupuangtu pawhin, “Gaza Strip-ah caravan leh hmanraw lian engmah a lut lo,” tiin X-ah a tar lang zui bawk.
Hamas leh Israel inkahhai thawh khatna hi chawlhkar ruk awh tur niin hetih chhung hian mi hren 33 leh Palestinian mi tang 1,900 chuang chhuah tur a ni.
January 19 atanga inkahhaiah Hamas hian Israeli an hren 16 an chhuah tawh a, Thai panga an chhuah tawh bawk.
Mi dang 17 la chhuah turte zingah hian naupang pahnih, hmeichhia pakhat, kum 50 chung mipa panga leh kum 50 hnuai pakua an la ni a. Chawlhkar thum lo awm leh tur chhunga Israel kuta hlan tura ruahman niin an zinga pariat hi an thi tawh.
Thawh hnihnaah mi hren 43 chhuah tura ruahman niin Israeli sipaiten Gaza an chhuahsan vek bawk ang a; mahse, hei hi la kalpui tan a ni lo.
Thawh khatnaah hian Gaza-a mihring chen tamna chu Israeli sipaiten an chhuahsan tawh a, chhim lama Palestinian tlanchhia tam takin hmar lam an pan leh tawh a, ni tin puihna bungraw phur lorry a lut bawk.
Israeli sipaite hian October 7, 2023-a Hamas-in an ram rûna mi 1,200 thata mi 251 hren tura an lak phuba lak nen a bei let.
Israeli sipaite chetna avang hian Gaza-ah mi 48,230 chuang an thi tawh niin Hamas enkawl health ministry chuan a sawi.
Gaza-a cheng tam zawk chu vawi tam an tlanchhia a, in ding 70% vel a chhia a. Damdawi in, tui lakna, inthiarna leh tui leh thil dang sawngbawlna a chhe bawk a. Ei tur, tuialhthei, damdawi leh awmna tur a vâng hle.