US-in thlawhna pahnihin India phur haw leh dawn

US-in thlawhna pahnihin India phur haw leh dawn
US thlawhna pahnih, an rama dan lova lut Indian phur lettu chu tun kar chhung hian India-ah a tum leh dawn a, a hmain Donald Trump-a sorkar hian Indian 104 a thawn haw tawh bawk.
Tun tuma Indian phurh haw turte hi an zat a la hriat loh va. Inrinniah a hmasa zawkin Amritsar, Punjab lutin a tukah a dang a tum leh ang.
Punjab Finance Minister Harpal Cheema chuan Amritsar-a thlawhna tumtir tua NDA kaihhruai sorkar laipuiin a ti hi an state tihmingchhiat tumnaah a puh a. “Haryana leh Gujarat-ah engati nge an tumtir loh? BJP-in Punjab hmel tihbalh a tumna a ni chiang a. Thlawhna hi Ahmedabad-ah a tum zawk tur a ni,” tiin a sawi niin India Today chuan a tar lang.
Indian thawn haw tumna hi Prime Minister Narendra Modi-a’n US tlawha Trump-a nena an inbiak dawn lai vela puan a ni a, an inkawmnaah hian dan lova pem pawh an thu khel tur lian zingah a tel.
Thawn haw hmasakte thawn haw dan khan sawi a hlawh hle a. Phuarin an keah khaidiata hlin an ni tih sawi a ni a. Congress President Mallikarjun Kharge chuan ‘bawlhhlawh tih dan ai pawhin a chhe zawk’ ti hialin a sawi a. Grand old party hian Modi-a hnenah hian Trump-a chu thawn hawte enkawl dan sawipui ngei turin an ti.
New Delhi pawhin India puma thawn hawte enkawl danin sawi a hlawh hnuah Washington-ah a thlen tawh bawk.
Indian thawn haw an nih rual hian Punjab leh Haryana-a police-te chuan travel agent thenkhat, sum tam tak la thin leh US-a dan zawm famkim lova Indian thawn thinte dap beihpui an thlak thar mek.
US hian India hnenah hian Indian ni ngeia hriat 487 thawn haw ngai an awm thu an lo thlen tawh niin chanchinbute chuan an tar lang a, a hmain dan lova lut mi 203 American thuneituten an hre chhuak bawk a, a tam zawk hi Mexico nena an inrina hrula mite an ni hlawm.
C-17 sipai thlawhna hmanga mi 104 thawn haw hmasak berte kha mi 203 zinga mi hi an ni a. A dang 99-te zinga 96 chu India-in a khua leh tui leh an nihna hre tawhin thawn haw leh tur an ni.
India-a foreign secretary Vikram Misri chuan US hian sorkar laipui hnenah thawn haw turte hi a hriattir tawh tih a sawi a. “Tun hnaia inbiaknaa thawn haw turte chanchin kimchang deuh dil an ni a, tunah hian India khua leh tui 487 chu hawtir tura tihfel an ni tawh,” a ti.