Hammers keeper thar Hermansen

West Ham United chuan Leicester City goalkeeper Mads Hermansen an lei a, a man zat hi official-a tarlan ni lo mah se pound maktaduai 20 vel nia ngaih a ni.
Denmark international hi Hammers chuan kum nga daih tur contract an ziahpui bakah an remti dun a nih chuan kum khat dang pawhsei theihin thu an thlung fel.
Season liamta khan kum 25-a upa Hermansen hi Leicester tan a chetha a, Premier League atanga tlak pumpelh zo lo mah se mimalin fak a hlawh.
An goalkeeper chhawr lai Poland mi Lukasz Fabianski chuan season tawp ruala a chhuahsan avangin West Ham-in keeper thar an sengluh ngei ngei a ngai a, hun rei tak an indawr hnuah karliamta khan Hermansen-a manah club pahnih an inrem a, an goalkeeper thar sengluh hian 2024-25 Premier League season-a match 26 khel tling kum 32 mi Alphonse Areola hmakhalh a tum dawn a ni.
Manager Graham Potter hnuaia West Ham goalkeeping coach ni mek Casper Ankergren hi Brondby lamah Hermansen nena lo thawkdun tawh an ni a, hei hi London club-in Dane lam an hawi chhan pawh ni ve pakhat tura ngaih a ni.
Hermansen hian 2024 Championship title an lakna kawngah khan Leicester tan match 72 a khel tling a, mahse, top flight-ah a team a inhamtanpui zo ta bik lo a ni.
Foxes chhuahsantu langsar zingah karliamta Zirtawpnia Turkish side Besiktas lama kal ta Wilfred Ndidi pawh telin, King Power Stadium-a kum riat leh a chanve zet a khawsak hnuah a chhuak ve ta a ni.