Handstand ti thei upa ber

Handstand ti thei upa ber
New Jersey, USA a cheng, Paul Budline chuan handstand tithei upa ber record a siam a, kum 75 leh ni 145 a upa a nihin handstand a la ti thei. Handstand chu a lema kan hmuh ang hian ke aiah kut hmanga a letling zawnga in nem kan a ni. Chunglamah ke tingilin, lu lei vit zawngin kut pahnih hmangin an innem kang thin.
Paul hian a tleirawl lai atangin handstand hi a ti tawh thin a, nitin exercise a la thin a, aerobics, cycling, rit chawi leh handstand a ti deuh ber thin. Mahse, Covid-19 lockdown lai khan a gym kalna an khar a, a kawng ruh an zai sak bawk a, rei tak exercise la thei lovin a awm phah ta a ni.
Paul chuan, “Handstand pawh ka ti thei ta lo va, ka ke pawh 45-degree vel bakin ka dah thei ta lo. Kum 70 mi lo nih tawh bawk nen a beidawn thlak khawp mai a, mahse, nitin ka bei leh tang tang a, ka ti leh thei ta a ni,” a ti.
Record siam tur hian handstand hi second 15 tal tih a ngai a, a hmaa hetiang record chu kum 70 miin a siam niin, Paul chuan, “Record hmasa kum 4 chuangin ka khum a, a nuam viau e,” a ti bawk.