Hari Mandhir humhalh dilna sut

Hari Mandhir humhalh dilna sut
Mizoram Gorkha Mandir Sanchalan Samiti chuan Aizawl Canteen Kuala Hari Mandir humhalh zuina an kuta dah tura Prime minister an dilna chu Mizoram hmasawnna an ngaihpawimawh avangin an sut tih an sawi.
Chief minister Lalduhoma chuan Thawhtanni khan Mizoram Gorkha Mandir Sanchalan Samiti Bazar Branch Aizawl hruaitute a kawm a, Canteen Kuala awm Hari Mandir chungchang a sawipui.
Gorkha Mandir Sanchalan Samiti hruaitute chuan Prime minister hnena lehkha an lo thehluh tawh, Hari Mandir humhalh zui tura an dilna chu, Mizoram hmasawnna an ngaihpawimawh vangin an sut tih chief minister hi an hrilh a. Sutna tura Prime minister hnena an lehkhathawn copy pawh chief minister hi an hlan a ni.
Hetih lai hian Hari Mandir hi Aizawl khawpui lailia veng 11 lawina a nih avang leh, Hari Mandir-a an bungraw thianghlim dahzuina tur an mamawh avangin an inkhawm zui zelna tur hmun sawrkarin ngaihtuahsak se an duh tih an thlen nghal a ni.
Chief minister hian lawmthu a lo hrilh a. Assam Rifles chhuahsan ram enkawl zui hi Advisory Commmittee kuta awm a nih avangin Hari Mandir sawnna tur chu ngaihtuahho a tul dawn tih a lo hrilh. A sawn theihna tur hmunhma remchang pawh dap tlangin, a tul anga sawiho zel turin thu a lo chah a ni.
AR ram Advisory Committee chuan NGO Coordination Committee chu Hari Mandir chungchangah Samiti hotute titipui turin a ngen tawh a, an report pawh Advisory Committee hnuhnung berah an pe tawh. An inkawmna kal zelah Samiti hruaitute hian chief minister hi an hmu a ni.