Harsa takin Manchester City an chak

August 23, Inrinni zan khan English Premier League 2026-27 khelh chhunzawm a ni a, champion tura rinkai Manchester City chuan an mualah harsa takin hnehna an chang. Harsa taka City an chak laiin Liverpool chuan St James Park-ah vanneihna an chang a, penalty hmangin tlawm an pumpelh thei hram. City leh Liverpool in point an hlawhchhuah laiin Aston Villa erawh chu Brighton lakah an mualpho a, 4-0 ngawtin an tlawm ve thung.
City chakpuitu Gvardiol
EPL ah champion tura rinkai ber zinga mi Manchester City hi manager thar Enzo Maresca hnuaiah a vawi khat nan an inlan a, Etihad Stadium a an mikhual AFCBournemouth lakah an chak zo lo teuh hle. Si phur hmasa zawka an tan reng hnuin defender Josko Gvardiol goal thun hmangin point thum hlu tak an hmu.
An mualah chak ngei tuma tan khawh Manchester City in bul an tan tha viau a, inkhel tir lamah goal thun theihna hun tha tak an nei nghal. Uiawm taka an hun tha neih an hlah hnuin Nico O’Reilly cross tha tak chu Erling Haaland chuan mak tak maiin a lo thelh teh tlat bawk a, an hun tha neih an hlah zawh.
Goal an chhuah teuh viau hnuin Etihad Stadium a lenglut AFC Bournemouth an insiamtha a, goal thun theihna hun tha an nei nghal. An hun tha neih chhawr tangkai zo lo mah se hun tha dang an nei leh thuai. Lei hrula Evanilson cross tha tak chu Marcus Tavernier chuan awlsam takin minute 26-naah a pet goal a, hmahruaina goal a thun.
Goal an chhuah hnuin City in goal thun ngei tumin tan an khawh nasa leh zual a, hun tha nei bawk mah se goal ah an chantir thei mai lo. Hun rei tak si an phurh hnuin Ryan Cherki corner chhuih tha tak chu defender Marc Guehi chuan minute 84-naah a tauh goal a, an si phurh a sut ta nge nge.
An si phurh an sut vangin City an phur a, chak ngei tumin tan an khawh nasa leh zual. Hun pangngai tawp hnuin bun pek belh minute 90+1-ah Ryan Cherki hnen atanga ball a dawn chu defender Josko Gvardiol chuan fuh tak a khalh tlang hnuin tha zetin a pet goal zui nghal a, hma an hruai letna goal a thun. Bournemouth in an si phurh sut tum viau mah se an hlawhtling zo tawh lova, Manchester City lakah uiawm takin a tlawm zui ta a ni.
Manager thar Enzo Maresca hnuaia an inlanna hmasa berah hnehna an chang nghal hian Manchester City hi inrintawkna sang zawk a pek ngei a rinawm. Hliam vangin City hi an that theih dan ang berin an la inlan thei lova, an dam chian hunah phei chuan tha zual zawka inlanin, champion phu an nihzia an lantir ngei a rinawm.
Liverool an vanne i
Manager thar Andoni Iraola kaihhruaina hnuaia an inlan hmasak berah Liverpool an tlawm teuh hle a, hun pek belh tawn dawn tepa penalty an hlawhchhuah hmangin tlawm an pumpelh hram chauh. Reds in tlawm an pumpelh dan hi vanneihthlak a tih loh theih lo.
St James Park-a an mikhual Liverpool lakah Newcastle United in bul an tan tha a, Anthony Elanga chuan inkhel tan atanga minute 5-na lekah hmahruaina goal a thun nghal. He goal hmang hian hun rei tak hma an hruai. Chawlhlawk hnu lamah Liverpool inbul an tan tha ve thung a, goal an thun ta thuai. Tottenham nena sawizawm Gody Gakpo chuan minute 55-naah goal thunin an si phurh a sut. An si phurh an sut vangin phur viau mah se Reds an phur rei lova, Newcastle tan Joe Willock chuan minute 57-naah hma an hruai letna goal a thun leh nghal zat. Newcastle in hun rei tak chhung hma an hruai a, an chak ngei tura ngaih a nih tawh laiin hun pek belh tawpna chiah minute 90+5-ah Liverpool an vannei a, penalty an hmu. He penalty hi Dominik Szoboszlai chuan tha zetin a pet goal a, an team tlawm tur a chhanhim zui ta a ni.