Hat-trick siam rang palina Lewandowski

Hat-trick siam rang palina Lewandowski
Barcelona player zingah La Liga inelna huang bika ‘hat-trick’ puitlin rang palina ni turin Pathianni zan Robert Lewandowski chuan first half minute 32 chhungin Deportivo Alaves lakah goal thum a thun hman a, he goal thum hmang hian Catalan team chuan sithum faiin mualneitu team an sawp.
Minute sarihna leh minute 22-a a goal hi captain Raphinha siamsak ve ve niin, darkar chanve pelh hleka a goal thumna erawh Eric Garcia chhawpsak a ni thung.
Alaves muala an point thum thawhchhuah leh hmangin Barcelona hian La Liga table-ah point thuma hma an hruaifalna an neikir leh a; Inrinnia an mikhual Villarreal an hneh hnu khan table-a pahnihna luahtu Real Madrid chuan Hansi Flick-a team hi point-ah an han nihrualpui hman a, away hnehna nen Nou Camp club-in an hum ngai an luah zui leh thei ta a ni.
A hma chawlhkarah khan Osasuna hneh loin Barca an mualpho a, season kal laia an chak zawh loh awmchhun a a la ni a; Alaves lakah insiamtha leh nghalin, hma taka Lewandowski goal a luh hnu khan hawikir tawh loin inkhel an thunun tluanchhuak thei.
An mikhualte laka hlauhawm siamchhuak zen zen zo lo Alaves khan half time dawnah an siphurh pakhat chu an sut then ve ngei tak nain Toni Martinez-a goal kha a intintuah laia offside foul avangin hnawlsak a ni.
Kum 36-a upa Pole khan a la tar lo tih Spain leilungah lantir chhunzawm zelin, a goal hmasa pahnihna kha Brazilian chhawpsak ve ve a ni kan ti tawh a, a goal thumna erawh Garcia pass atanga a chhuih chu home goalkeeper Antonio Sivera tana dan ngaihna awm lo leh bawk a ni.
Poland forward hian tun season kal lai inelna hrang hrangah Barca tan game 11 lek atangin goal 12 a thun tling der tawh a, tun term-ah hian Spanish top flight game tina goal thum zel thun ang a ni hem mai!
A goal thum thun hmangin Lewandowski kha tun season La Liga bika goal 10 khawl tling hmasaber a ni a, Europe top league huap chuan top flight goal 10 khung tling pahnihna niin, Manchester City striker Erling Haaland a hmakhalh zo lo.
Inkhelh banah a goal thun tur chhawpsaktute fakin, “An ball min pek tha tak takte avang khan ka tan goal khung a awlsam phah a ni.
“|an phat atang khan kan game a fuh nghal a, attack duhna nei chungin goal kan zawng tlat a, second half-ah phei kha chuan inkhel kan thunun nghet lehzual.
“Team tha tak kan ni a, kha ai khan kan la khel tha lehzual theiin ka hria a, kan tlakbalna zawng zawngah hma kan sawn niin ka hria,” a ti.
Pathianni inkhelah Barcelona star lian ni chho ta Lamine Yamal a reh hle a, a standard kan lo hmuh tawh kha a lantir zo lo a, second half minute 67-ah an lachhuak ta daih nghe nghe!
Winger kum 17 mi hian a game khelh hnuhnung pahnihah goal a thun zo lo mai ni loin assist takngial pawh a siamchhuak zo lo a, lakchhuah a nih hnuah lunghnur hmel takin bench-ah a thu ngui nghia a, a shin guard a thehphar lap bawk!
Inkhel dangah Girona goalkeeper Paulo Gazzaniga a langsar a, penalty vawihnih dangin, pakhat zawk phei chu an petnawnna pawh a la dang ta zel a, a chet hero-na hian an tlarhma luahtute phurna pein, hun pekbelh tawp dawn thlenga an nawr rah sengin striker Cristhian Stuani chuan Athletic Bilbao laka 2-1-a Girona chakna goal a thun zui ta a ni.
Girona hian khelh kuaa point 12 hum chungin table-ah 11-na an luah lailawk rih a; point 14 nei tawh Bilbao chu parukna an ni thung.