Haulawng PHC-in endik hmachhawn

India rama sawrkar damdawi in tha tehna sang ber, National Quality Assurance Standard (NQAS) external assessment chu April 25 & 26 khan Haulawng Primary Health Centre-ah neih a ni.
Endiktu Dr Sabina Yashar leh Dr Supriya Chauduri te hi PHC Haulawng medical officer Dr Lalduhawmi chuan a lo dawngsawng a. Dr Supriya Chauduri chuan Haulawng khuain an tawiawmnaah lawmthu sawiin, NGO pawhin nasa takin damdawi in tan tha an thawh tih a hriatin, hei hian mark tam tak a phu tih a sawi. Malaria do kawngah ram pumin nasa taka hma lak a ni tih sawiin, Haulawng hospital pawhin theihtawp chhuahin, mipuiin department hmalakna tawiawm zel turin a sawm tih a sawi bawk.
NQAS hi India ram puma sawrkar damdawi in that leh that loh tehna a ni a. Damdawi in lian ber atanga Health & Wellness Centre (Sub-Centre) thlengin tehfung hran theuh a nei. Damdawi ina damloten enkawlna an dawn a that tawk leh tawk loh teh a ni ber a. NQAS endikna hmang hian certified assessor-ten district level atangin endik hmasak berin, chuta tha tawka an ngaih chuan state level atangin an endik leh thin. Heta tithate chu national level atanga endik tura tih leh thin a ni a. National level tehnaa tling tur hian assessment ah 70% score tlin a ngai a ni.
PHC Haulawng hi Lunglei district-a NQAS external assessment hmachhawn thei PHC hmasa ber niin, certified a nih chuan Mizoram pumah Aibawk PHC leh Thingsulthluah PHC hnung zuiin a pathumna tur a ni dawn a ni.