Luidung thenfai beihpui thlak zo

Environment, Forests & Climate Change department hnuaia kalpui mek Nature Learning Centre (NLC) Champhai kaltlanga buatsaih, luidung thenfai leh humhalh hnatlang chu April 24-26 chhung khan Tuipui luidungah neih a ni.
NLC thawktute bakah Champhaia Bethel Mission School, Govt. Bethel Middle School leh Forest Department staff-te atangin mi 250 vel an thawkchhuak a. Hnatlang kaltlang hian Champhai khawpui chawmtu tui lakna Tuipui lui leh a fintu Keilungliah lui thenfai a ni. Hnatlangte hian bawlhhlawh chi hrang hrang – zu um ruak, plastic leh sarang, diaper, plastic um ruak, vawk thi, ui thi, ar thi leh oil chhia paihte an thianfai a. Tuipui luidunga kai hrang hrangah bawlhhlawh bawm leh mipui zirtirna atan signboard-te an tar nghal a. Bawlhhlawh an chharkhawm hi Zotlang Dumping Ground-ah halral tura paih a ni.
Luidung thenfai hnatlanga thawkte hian mipui hnenah ngenna siamin, Champhai tui tlan ber Tuipui luidunga bawlhhlawh chitin reng paih a ni thin chu pawi an tih thu leh heng bawlhhlawh hi a tawpin hriselna atan pawh a that loh thu an sawi a. Dan zawm loa Champhai khawpui tui tlan ber Tuipui leh a fintu Keilungliah luidung bakah anmahni fintu kawrte leh a chhehvela bawlhhlawh paih mai mai thinte chu tun hnuah paih tawh lo turin an ngen a ni.
Nature Learning Centre hi Champhai Forest Division-in National Mission on Himalayan Studies project a kalpui mek hnuai ami a ni a; environment humhalh kawngah programme hrang hrang an lo kalpui tawh a ni.