Hausak belh leh sawtna tur Roland Garros

Hausak belh leh sawtna tur Roland Garros
Tun Pathianni atanga khelh tan tur French Open-a an lawmman dawn tur sum fai hi nikum ai khan 5.21 percent laiin an tipung leh tawh a, kumina lawmmana an semchhuah tur zawng zawng belhkhawm hi US dollar maktaduai 63.7 zet a tling.
Mipa lama champion lai Carlos Alcaraz chuan 2024 final-ah khan set nga zet an inbeih hnuah Alexander Zverev a hneh hram kha a ni a, a vawikhatna atana French Open title a lak rualin millionaire a ni nghal a; kumin hian mipa leh hmeichhia (men’s and women’s) singles champion kutah US dollar maktaduai 2.9 ve ve a lut dawn a, nikum aia a punna hi US dollar 170,000 zet a tling!
Tennis calendar-a kum khat chhunga Grand Slam tournament pahnihna French Open prize money hi COVID-19 hripui avanga kum 2021-a a sukuk hnu khan a zawnin kum li chhung chu a pung chho ta char char a; kum 2021 atanga a punna hi 60 percent lai a tling tawh a ni.
Grand Slam tournament pali zingah French Open hi lawmman sum thehchhuak tam pathumna niin, nikum, 2024 khan U.S. Open (USD 75 million) an sang ber a, Wimbledon (USD 66.1 million)-in an dawt a; tun January thla khan sum sem tlem ber Australian Open total prize money semchhuah chuan US dollar maktaduai 60 vel a tling chho ve bawk.
French Open hi damdawi hman phal loh zinga mi ‘clostebol’ a lo hmang tih nikuma an manchhuah avanga thla thum an hrem hnua men’s world No. 1 Jannik Sinner-a’n Grand Slam tournament a khelh leh hmasakber tur a ni.
Kum 23-a upa Italian hi hremna a tawrh zawh hnuah tunhnai lawka khelh zawh tak Italian Open-ah khan a rawn kir leh thei ta a, mahse, a home tournament-ah champion zo loin final-a a khingpui Spaniard Carlos Alcaraz a hneh lo a; kha result avang khan kum 22 mi Alcaraz chuan ATP ranking tharah a dinhmun a chawikang a, world No. 2 a ni mek.
Kumin Roland Garros-ah hian mipa leh hmeichhia sawi loa Grand Slam singles title la hnem ber nih a tumna kawnga champion belh thei ta hlek lo Novak Djokovic chu kan hmu leh dawn a; tennis a chawlhsan hmaa a hmachhawp hraw lutuk hlenchhuah tumin Paris-ah hian a inlan dawn a, a champion leh chuan Grand Slam title 25 nen a chawl ve thei tawh dawn a ni.
Tunkar Ningania kum 38 tling chho ve chiah Djokovic hian a tum a hlen zo a nih chuan lehpelh leh mai mai harsa lutuk tur record nen tennis a chawlhsan thei dawn a, mahse, hmeichhe lama record chungnung lehzual hnutchhiah chunga chawlh tum Serena Willims ang deuh khan Serb hian nikum atang tawh khan champion a harsat ve ta tlat a, a kum tam zel leh thangthar tha za zawk lo chhuak zel hi a innang fuh ve ta deuh a ni mai thei!
Hmeichhe lamah chuan top-ranked Aryna Sabalenka of Belarus pawhi Paris-ah hian a career-a a Grand Slam title palina tur a beisei ve bawk dawn a, kumin Australian Open final-ah khan Madison Keys a hneh lo tawh a, Roland Garros-ah hian eng dinhmun nge a tawn leh dawn kan thlir ang.