Havertz manah Arsenal leh Chelsea an inrem

London club lian pahnih Arsenal leh Chelsea te chu German forward Kai Havertz man leh mualah £65m in an inrem.
Arsenal hian Kai Havertz manah £60m an pe phawt ang a, a khelh that dan a zirin Chelsea hnenah £5m an pek belh zui leh ang. Blues nen man leh mualah an inrem hnuin Gunners hian mimal inremna neihpui turin Havertz an dawr zui leh ang a, medical test a hmachhawn zui leh bawk ang.
EPL season liam taah uiawm taka champion zo lo Arsenal hian an squad thuamchak thar an tum viau a, an manager Mikel Arteta-a’n hun rei tak a lo awh tawh Havertz an la thei ngei dawn niin a lang ta a. West Ham United atangin England midfielder Declan Rice lak fel thuai tumin hma an la zui leh ang. Gunners hian Rice lak tumin West Ham hi tum hnih an dawr tawh a, an la hlawhtling lo ve ve. A tum thum nan dawr leh thuai an tum a, hlawhtling tawh ngei turah an inngai. Rice bakah hian rawlthar midfielder Romeo Latvia lak tumin hma an la mek bawk.
Arsenal player thar ni thuai tura ngaih Kai Havertz hian kum 2020 khan Bayer Leverkusen atangin Chelsea hi a zawm a. A hun lai hian Chelsea player manto ber a ni. Chelsea hian Havertz manah hian £71m zet an seng. Chelsea player pawimawh niin, champions league 2021-a an champion na goal thuntu kha a ni. Blues tan hian season liam ta khan vawi 47 zet a khel a, goal kua a thun. Chelsea hian contract thar an zawrhnaa club dangah chona thar hmachhawn turin chhuah a thlang ta zawk.
Thlasik bazara sum seng hnem Chelsea an inthuahthawl mek a, Havertz bakah hian Croatia midfielder Mateo Kovacic chuan Manchester City a zawm dawn a. Midfielder pawi-mawh N’Golo Kante pawhin Saudi Arabian champions Al-Ittihad a zawm dawn bawk. London club lian Chelsea hian European competition an khelh phak dawn loh vangin an sum lak luh a tlem dawn a, an sum lak luh leh player hlawha an sen inbuktawk turin tan an lak an ngai. Chumi vang chuan an hnena contract nei rei tawhte chhuahtir an hreh lo a, Gabon forward Aubameyang pawh chhuahtir an rilruk bawk.