HBC-in zirlai tharte lo lawm

Govt. Hrangbana College chuan zirlai lut tharte lawmluhna chu Zirtawpni khan an hmang. Hmnapuitu minister Lalrinpuii chuan zirlai nih chhung chuan hun leh ngaihtuahna la peng thei, pawl hrang hranga inhman tam loh a tul tih sawiin, social media leh internet hman kawngah rilru hruaisual thei thil khawih lo turin a chah. College zirlaite chu kum leh pumruaah pawh puitling anga ngaih an nih tawh angin, hlawhtlinna chang tur chuan mahni an inthunun theih a pawimawh tih a sawi a ni.
Mizo mipate chu ruihhlo laka fihlim turn leh, chhungkaw pa ber mawhphurhna la tlak nih tum turin a fuih a. Ruihhlo hmansual chu hnam hmelma lian ber, hmasawnna tithuanawp thintu, chhungkaw tichhe theitu leh mihring beidawnga siam theitu a nih angin, ruihhlo bawiha tang mekte chhanchhuah leh la ti ve lote venhim chu sawrkarin a ngaipawimawh tih a sawi a ni.
‘Freshers’ Social & Felicitation Program’ ah hian an college magazine ‘Herhse’ chu tlangzarh a ni a. Hrangbana Awards, R.Zatlaia Award, Dr Suprakash Maiti Award leh Department Awards sem a ni.
Govt. Hrangbana College-ah hian department 10 awmin, zirlai 1683 an awm mek. Teaching staff 59 leh non-teaching staff 18 an awm. Kum 2024 University Exam-ah khan department 10 atang hian an zirlai 25 chu top 10-ah an lang a, M.Com ah mi panga top 10 ah an lang bawk.