Northeast Frontier Railways hotute chuan rel kawng siamna la bo lo turin mipui an ngen nawn.
Hun reilotea thawh zawh beisei, Bairabi – Sairang New Line Project (km.51.38) chungchangah larsap Dr Hari Babu Kambhampati chuan Zirtawpni khan NF Railway (NFR) engineer-te Raj Bhavan-ah koin a hnathawh a thlirlet pui.
NFR chief engineer (Construction) Vinod Kumar leh amah tawiawmtute chuan Aizawl kawtkaia bungrua leh passenger service thlen tur rel kawng siam meka hmasawnna an neih dan powerpoint presentation hmangin an sawifiah a. Mipui tana rel service a himna turin rel kawng siamna bungrua te la bo lo turin ngenna an siam nawn. Rel a rawn luh hunah rel kawngin a tantlang mipui chu rel tlan hun chhunga rel kawng kan loa, hnaih lo tura fimkhur turin an chah bawk.
Larsap chuan Mizoram hmasawnna atana transportation service pawimawh bera ngaih, rel kawng tha tak siamsaktu sawrkar laipui leh Indian Railways chungah lawmthu a sawi a. Rel hian Mizoram leh thenawm state Assam inkara zin hun darkar 3-4 inkar vela a tihtlem dawn bakah passenger leh bungraw phurh senso nasa takin a titlem dawn tih a sawi. Mizorama entrepreneur-te chu relin a kentel sumdawnna liantham tak tak a awm dawn avanga lo inpuahchah tha turin a chah bawk.
* He project senso hi ennawn a nih hnuin cheng vaibelchhe 8213.72 a ni a, tunah hian physical work zaa 93 zawh a ni tawh.
* He rel kawngah hian station pali – Hortoki, Kawnpui, Mualkhang, leh Sairang a awm dawn a. Bairabi leh Sairang inkar line thar, km. 51.38 chu section pali: Bairabi – Hortoki, Hortoki – Kawnpui, Kawnpui – Mualkhang, leh Mualkhang – Sairang a then a ni.
* NFR-in Bairabi – Hortoki section-a trial run hlawhtling tak a lo neih tawh avangin, Hortoki Station hi tun thla chhunga hawn tum niin, Mizoramah Hortoki thleng rel a lut tawh dawn.
* Kuminah tho hian Hortoki – Kawnpui section leh Kawnpui – Mualkhang section pawh relin a zawh thei dawn a. July thla chhung hian NFR chuan Sairang Terminal Station hawn a tum a ni.
NF Railways lamin rel kawng siamna la bo lo turin ngen leh
Get real time updates directly on you device, subscribe now.
Prev Post