HBC zirlaiten thiamthil entir

HBC zirlaiten thiamthil entir
Govt Hrangbana College chuan Zirtawpni khan an college hmunah Freedom Arts (FAS) Show an buatsaih a. Thiamthil phochhuakin, zirlaite hmaah entir a ni.
Govt HBC-ah hian zirlaite talent hai chhuak tur leh college an zawh huna eizawnna an neih theihna turin an intuaihriamna tur club hrang hrang – innovation club, theatre club, music club, weber club, eco club, cultural club, culinary club, literature club, visual arts club, choreography club, book club, adventure club, consumer club, writer club te an nei a. Hengah hian an tui zawngah zirlaite hi an tel mai thin a ni.
Innovation Club bultumin chhun lamah zirlaite hian anmahni kutkawiha an siam – ei tur, incheina tlereuh, lemziakte phochhuakin, tlawhtute tan lei theih a ni. Tlai lamah neih chhunzawmin, club hrang hrangten an thiamthil an entir a. Labour, Employment, Skill Development & Entrepreneurship (LESDE) director Angela Zothanpuii chuan hmanpuiin, Govt. HBC zirtirtuten an zirlaite talent haichhuak zawnga hun an buatsaih thin chu fakawm a tih thu a sawi. An department nen pawh inkungkaihin, thalaite talent haichhuah kawngah puih an inhuam thu leh chumi atan tul angte ti zel turin sawrkar a inhawn reng thu a sawi a ni.
Tlai lama show-ah hian Theatre Club-in lemchan an entir a, Choreography Club-in lam chi hrang hrang an entir bawk. Taekwondo Team-in mahni inven dan entirin, Cultural Club-in Zo hnam lam an entir a, Music Club-in zaiin an awi a ni.
Govt. Hrangbana College-ah hian hrilen lai tih lohah chuan Freedom Arts Society hian kum 2017 atang khan hetiang hun hi an buatsaih thin a. Zirlai chauh ni lo, hmundang atang pawhin an hlutpui hle. An zirlai chhuak tawh FAS-a an inhman atanga hlawhtlinna kawng zawh chho tawh leh hminghriat hlawh tak tak pawh an awm tawh tih an sawi a ni.